اسلام آباد:(دنیا نیوز) وزارت منصوبہ بندی نے ’اڑان پاکستان‘ کے تحت مصنوعی ذہانت ٹیکا تھون 1.0 متعارف کرا دی گئی۔
وفاقی دارالحکومت میں ’ اُڑان اے آئی ٹیکاتھون 1.0‘ کی افتتاحی تقریب سے خطاب کرتے ہوئے وفاقی وزیر منصوبہ بندی احسن اقبال کا کہنا تھا کہ ٹیکاتھون 1.0 پاکستان میں قومی سطح پر مصنوعی ذہانت مقابلوں کا آغاز ہے۔
انہوں نے کہا کہ آج کا دن پاکستان کی ڈیجیٹل تاریخ کا سنگ میل ہے، یہ صرف ایک مقابلہ نہیں، بلکہ تحریک ہے جو نوجوانوں کو اے آئی میں فعال کرے گی، مصنوعی ذہانت مستقبل نہیں، حال ہے، صحت، تعلیم، زراعت، صنعت اور گورننس بدل رہی ہے۔
وفاقی وزیر منصوبہ بندی کا کہنا تھا کہ آج فیصلے معیشتوں میں نہیں بلکہ الگوردمز میں ہوتے ہیں، پاکستان کے پاس دو راستے ہیں یا انقلاب کا حصہ بنے یا دوسروں پر انحصار کرے، ترقی کا راز استحکام، پالیسی تسلسل اور اصلاحات میں ہے۔
احسن اقبال نے کہا کہ پاکستان اے آئی انقلاب کا تماشائی نہیں، اُبھرتا ہوا لیڈر ہوگا، ٹیکاتھون 1.0 نوجوانوں کے ذریعے قومی ترقی کی نئی راہیں کھولے گا، حکومت کی ترجیح صحت، تعلیم، زراعت اور موسمیاتی تبدیلی میں جدید اے آئی حل لانا ہے۔
ان کا کہنا تھا کہ مقامی سٹارٹ اپس، یونیورسٹیز اور ٹیکنالوجی پارکس کو سپورٹ کیا جائے گا، ٹیکاتھون اُڑان پاکستان کے ویژن کا مظہر ہے جو 2035 تک ایک ٹریلین ڈالر معیشت کی سمت لے جا رہا ہے، منصوبہ پانچ ستونوں پر مبنی ہے۔
وفاقی وزیر منصوبہ نے کہا کہ ٹیکاتھون ای۔ پاکستان اور نوجوانوں کو بااختیار بنانے سے جڑا ہے، جسے اے آئی نصاب میں شامل کیا جا رہا ہے، اور اسے قومی صلاحیت کو متحرک کیا جا رہا ہے، نوجوانوں میں وہی ولولہ ہے جو دنیا کے ٹیکنالوجی حبز کو طاقت دیتا ہے۔
احسن اقبال اے کا کہنا تھا کہ اے آئی فصلوں میں بیماری کی پیشگوئی، صحت میں ڈاکٹروں کی معاونت اور تعلیم ہر بچے تک پہنچا سکتا ہے، حکومت قومی فورس، فنڈز اور سینٹرز آف ایکسیلینس قائم کر رہی ہے۔
انہوں نے مزید کہا کہ نوجوانوں کی سوچ، آئیڈیا اور ویژن پاکستان کا اثاثہ ہیں، نوجوان آگے بڑھیں، تجربہ کریں اور ثابت کریں کہ وہ دنیا میں کسی سے کم نہیں۔
