اسلام آباد: (ویب ڈیسک) پاکستان ٹیلی کمیونیکیشن کمپنی نے انٹرنیٹ سروس کی فراہمی میں تعطل کی تصدیق کر دی۔
کمپنی کی جانب سے جاری اعلامیے میں کہا گیا ہے کہ (پی ٹی سی ایل) اور یوفون کی سروسز پر ڈیٹا کنیکٹیویٹی کے مسائل کا سامنا ہے، پی ٹی سی ایل اور یوفون کی ٹیمیں خدمات کی جلد از جلد بحالی کیلئے پوری مستعدی سے کام کر رہی ہیں۔
ترجمان کا کہنا ہے کہ ہم اس تکلیف کیلئے صارفین سے معذرت خواہ ہیں، تاہم انہوں نے ملک گیر بریک ڈاؤن کی وجہ بیان نہیں کی۔
یہ خبر بھی پڑھیں: ملک بھر میں انٹرنیٹ سروسز متاثر، صارفین کو مشکلات کا سامنا
یاد رہے کہ گزشتہ رات کراچی میں شدید بارش کے باعث پی ٹی سی ایل انٹرنیٹ اور یوفون سروسز میں بڑی رکاوٹ پیش آئی جس سے ملک بھر میں صارفین متاثر ہوئے جبکہ پی ٹی سی ایل سے ہول سیل میں انٹرنیٹ سروسز خریدنے والے دیگر ٹیلی کام آپریٹرز جاز، زونگ اور ٹیلی نار کے صارفین کو بھی ڈیٹا سروس میں رکاوٹوں کا سامنا کرنا پڑا۔
گلوبل انٹرنیٹ واچ ڈاگ نیٹ بلاکس نے تصدیق کی کہ پاکستان بھر میں انٹرنیٹ کنیکٹیوٹی بری طرح متاثر ہوئی ہے، جس میں پی ٹی سی ایل کو شدید نقصان پہنچا اور ملک کی مجموعی کنیکٹیوٹی معمول کے مقابلے میں 20 فیصد کی سطح تک گر گئی۔
