سلیکان ویلی: (ویب ڈیسک) میٹا نے فیس بک اور انسٹاگرام ریلز کے لیے نیا AI وائس ٹرانسلیشن فیچر متعارف کرا دیا ہے جو مواد تخلیق کرنے والوں کو اپنی ویڈیوز کو متعدد زبانوں میں پیش کرنے کی سہولت فراہم کرتا ہے۔
میٹا کے مطابق اس جدید فیچر کے ذریعے صارفین کو ہر زبان کے لیے الگ ریکارڈنگ کرنے کی ضرورت نہیں رہے گی، میٹا اے آئی ٹرانسلیشنز فیچر فی الحال انگریزی اور ہسپانوی کے درمیان ترجمے کی سہولت دیتا ہے جبکہ آئندہ مزید زبانوں کو شامل کیا جائے گا۔
اس ٹول کے ذریعے نہ صرف آواز کا ترجمہ ممکن ہوگا بلکہ ویڈیو میں بولنے والے کے ہونٹ بھی AI لِپ-سِنگ کے ذریعے ترجمہ شدہ آواز کے مطابق حرکت کریں گے، جس سے ناظرین کو زیادہ قدرتی اور ہموار تجربہ ملے گا۔
تخلیق کار کو ٹرانسلیشن کا آپشن منتخب کرنا ہوگا، سیٹنگز میں جا کر ترجمے اور لِپ-سِنگنگ کو فعال یا غیر فعال کیا جا سکتا ہے، ریل شیئر کرنے سے پہلے ترجمے کا پیشگی جائزہ لینے کا اختیار بھی دستیاب ہوگا۔
جب ترجمہ مکمل ہو جائے گا تو صارفین کو نوٹیفکیشن ملے گا یا وہ پروفیشنل ڈیش بورڈ میں جا کر ترجمے کو فائنل کر سکتے ہیں۔
میٹا کے مطابق اس ٹول کا مقصد گلوبل کنیکٹیویٹی کو مزید فروغ دینا ہے تاکہ تخلیق کار اپنی ویڈیوز زیادہ بڑے اور متنوع ناظرین تک پہنچا سکیں۔
یہ فیچر دنیا بھر میں بیک وقت متعارف کرایا گیا ہے اور بالکل مفت ہے۔
