کراچی :(دنیا نیوز) وفاقی وزیر شزا فاطمہ نے کہا ہے کہ سات شہروں کو فائیو جی ٹیکنالوجی فراہمی سے آغاز کر کے پورے ملک میں جائیں گے۔
شہر قائد میں تقریب سے خطاب کرتے ہوئے شزا فاطمہ کا کہنا تھا کہ ٹیکنالوجی، ڈیٹا کا استعمال اور ملک میں فری لانسر بڑھ رہے ہیں، پاکستان پائیدار معاشی استحکام کی طرف گامزن ہے۔
اُنہوں نے کہا کہ آج دنیا بھر میں پاکستان کی پذیرائی ہو رہی ہے، زرمبادلہ کے ذخائر بڑھ رہے ہیں، مہنگائی اور پالیسی ریٹ میں نمایاں کمی ہوئی ہے، ملک میں آئی ٹی کا شعبہ تیزی سے ترقی کر رہا ہے، پاکستان کا آئی ٹی سسٹم مومینٹم پکڑ رہا ہے۔
وفاقی وزیر کا کہنا تھا کہ 2 سال کے ٹیکس کے اعداد بھی شاندار ہیں، ایس آئی ایف سی نے اندرونی مسائل کو حل کر کے راہ ہموار کی، ایف بی آر اور دیگر اداروں کی ڈیجٹلائزیشن شروع کر دی ہے، 30 سال سے کم عمر 60 فیصد نوجوان ہمارا اثاثہ ہیں۔
شزا فاطمہ نے کہا کہ سعودی عرب پیکیج میں آئی ٹی اہم ہے، انٹرنیٹ کنکشن کے لیے دو سب مرین لائنز لینڈ کر چکی ہیں، 3 لائنز پر کام کر رہے ہیں، چین سے بات کر رہے ہیں، 274 میگا ہرٹز سپکٹرم 8 لین کی گاڑیاں دو لین میں چل رہی ہیں، یہ کنکٹیوٹی پر اثر انداز ہوتی ہے۔
اُن کا کہنا تھا کہ کورٹ میں جمود کیسز کو سال کے آخر تک حل کرلیں گے، سال کے آخر تک ہمارا سپکٹرم ایک ہزار میگاہرٹز ہوجائے گا، سات شہروں کو فائیو جی ٹیکنالوجی فراہمی سے آغاز کر کے پورے ملک میں جائیں گے، نوجوانوں کو اے آئی اور سائبر سکیورٹی کی صلاحیت دینی ہے۔ 10 لاکھ بچوں کو اے آئی کی تربیت دیں گے۔
وفاقی وزیر نے مزید کہا کہ کراچی ملک کا معاشی مرکز ہے، ہم نے ملک کو ڈیفالٹ ہونے سے بچایا، عام شہری سے وزیراعظم تک کی محنت نظر آتی ہے، مہنگائی اور پالیسی ریٹ میں نمایاں کمی ہوئی ہے۔
