صرف ایک عادت بدلنے سے 136 کلو وزن کم کرنے والی خاتون
Last Updated On 28 January,2019 10:23 am
(ویب ڈیسک) ایک عام عادت کو ترک کرنے سے امریکی خاتون لیکسی ریڈ نے 136 کلو وزن کم کرلیا۔ 2016 کے آغاز پر لیکسی ریڈ کا وزن 220 کلوگرام تھا۔
انسٹاگرام پر لیکسی نے بتایا کہ وہ روزانہ کم از کم 6 ہزار کیلوریز جزو بدن بنارہی تھی، وہ دن بھر میں باہر سے کئی بار فاسٹ فوڈ کھاتی اور انہیں تلی ہوئی غذائیں پسند تھیں۔
انہوں نے بتایا کہ ناشتے، دوپہر اور رات کے کھانے ہر وقت میں فاسٹ فوڈ ہی استعمال کرتی جبکہ دن کے دیگر اوقات میں بسکٹ، سافٹ ڈرنکس اور ایسی ہی چیزوں سے دل بہلاتی۔
مگر جب ان کا وزن 220 کلوگرام تک پہنچا تو جسمانی حالت خراب ہونے لگی اور انہوں نے جنوری 2016 میں خود کو بدلنے کا عزم کرتے ہوئے زندگی میں ایک تبدیلی لانے کا فیصلہ کیا۔ اور یہ تبدیلی تھی فاسٹ فوڈ کو چھوڑ کر گھر میں پکے کھانوں کا استعمال جبکہ سافٹ ڈرنکس کو ترک کردینا۔
انہوں نے ہفتے میں 5 دن ورزش کو بھی اپنا معمول بنایا اور کچھ عرصے بعد جم جانا بھی شروع کردیا۔ انہیں کچھ عرصہ ضرور لگا مگر بہت جلد وہ اپنے نئے اور صحت مند طرز زندگی کی عادی ہوگئیں جبکہ موٹاپا بھی کم ہونے لگا۔
انہوں نے ناشتے میں ابلے ہوئے انڈے، دوپہر کے کھانے میں مچھلی اور سلاد جبکہ رات کو چکن سینڈوج اور شکرقندی کو کھانا معمول بنایا جبکہ بے وقت بھوک کے لیے بادام کا سہارا لینے لگیں۔
