بنکاک: (ویب ڈیسک) تھائی لینڈ میں ایک ایئر کنڈیشنر سے 5 سانپ نکل آئے۔ شہری نے تصاویر فیس بک پر شیئر کر دیں۔
خبر رساں ادارے کے مطابق تھائی لینڈ کے شہری نے سماجی رابطوں کی ویب سائٹ فیس بک پر پوسٹ شیئر کی جس میں اس نے اپنے ساتھ ہونے والے انوکھے واقعے کا ذکر کیا۔ سومکیات تھاورنسک نامی شہری نے بتایا کہ کمرے میں لگے ائیرکنڈیشنر میں سے رات کے اوقات میں کچھ آوازیں آنا شروع ہوئیں جس پر اس نے ائیرکنڈیشنر کھولا تو وہ سانپ دیکھ کر حیرت اور خوف کی تصویر بن گیا۔
سومکیات نے جیسے ہی ائیرکنڈیشنر کھولا تو وہ زور سے چیخ اٹھا کیونکہ اس میں سانپ رینگ رہے تھے۔ اس نے فیس بک کی پوسٹ میں لکھا کہ میں نہیں جانتا کہ یہ کس طرح کے سانپ تھے اور یہ یہاں پر کیسے آئے، جب اس نے ان سانپ کو پکڑ کر باہر نکالا تو یہ کُل 5 سانپ تھے۔
