کیلیفورنیا: (ویب ڈیسک) امریکی ریاست میسی پیسی میں طوفانی بارشوں نے تباہی مچائی ہوئی ہے وہاں ایک ویڈیو وائرل ہو رہی ہے جس میں مگر مچھ سڑک پر نکل آیا۔
غیر ملکی خبر رساں ادارے کے مطابق امریکی ریاست میسی پیسی کے ساحل سمندر بولیورڈ سے ایک مگر مچھ سڑک پر آ گیا جسے دیکھ کر مسافر حیران رہ گئے، یہ مگر مچھ دریائے میسی پیسی کے قریب دیکھا گیا۔
سرکاری حکام کے مطابق مگر مچھ کا سڑک پر آنے کا واقعہ اتوار کے روز کا ہے، ریاست میں مزید تیز بارش کا امکان ہے، کچھ علاقوں میں سیلاب آنے کا خطرہ ہے، شہری بوقت ضرورت ہی گھر سے باہر نکلیں کیونکہ اس طرح کے مزید جانور سڑک پر آ سکتے ہیں جس سے شہریوں کو نقصان پہنچنے کا خدشہ ہے۔
مگر مچھ کے سڑک پر آنے کی ویڈیو بنانے والے جوڑے کا امریکی ٹی وی فوکس 10 کو انٹرویو کے دوران کہنا تھا کہ ہم گاڑی پر جا رہے تھے کہ راستے میں ہمیں مگر مچھ سڑک پر نظر آیا جس کی ویڈیو بنائی، پہلے تو دیکھ کر ہم گھبرا گئے تھے تاہم بعد میں ہمیں افسوس ہوا کہ ہم اس کی مدد نہیں کر سکے۔
