قاہرہ: (روزنامہ دنیا) مصری ماہرین آثار قدیمہ نے دعویٰ کیا ہے کہ انہوں نے فرانسیسی ماہرین کی مدد سے تقریبا 3500 سال پرانے خواتین کے تابوت دریافت کئے ہیں۔
مصری ماہرین نے خواتین کے تابوت دریافت کرنے کے دعوے سے 4 دن قبل ہی 24 نومبر کو 75 تابوت اور جانوروں کی حنوط شدہ لاشیں جبکہ ماہ اکتوبر میں دریائے نیل کے کنارے واقع شہر اقصر کے قریب الاساسیف نامی علاقے سے 3 ہزار سال پرانے مرد، خواتین اور بچوں کے تابوت اصل حالت میں دریافت کرنے کا دعویٰ کیا تھا۔
میڈیا رپورٹس کے مطابق نئے ملنے تین تابوت دریائے نیل کے کنارے واقع شہر اقصر کے قریب الاساسیف علاقے سے ہی ملے ہیں جن میں سے 2 تابوت خواتین کے ہیں جن کی لمبائی 190 سینٹی میٹر تک ہے، ان میں سے ایک کا نام تی آبو اور دوسری کا راؤ ہے جبکہ ایک تابوت مرد کا جس کی لمبائی 180 سینٹی میٹر کا ہے اور اس پر کسی قسم کی تحریر درج نہیں، خواتین کے تابوتوں پر قدیم مصری تہذیب کی زبان درج ہے اوروہ آرٹ کے نمونوں سے سجے ہیں۔
ماہرین کا کہنا تھا کہ دریافت ہونے والے تینوں تابوت 1550 سے 1295 قبل مسیح کے ہیں اور ان کا تعلق بھی فرعونوں کے خاندان سے ہوگا۔
