ٹوکیو: (ویب ڈیسک) جاپان میں سمندر کے اندر آتش فشاں پھٹنے سے ایک نیا جزیرہ بن گیا۔
غیر ملکی میڈیا کے مطابق ٹوکیو سے 12 سو کلومیٹر دور جنوب کی جانب زیر سمندر تین ہفتے قبل ایک آتش فشاں پھٹا تھا جس کے باعث اب ایک جزیرہ نمودار ہوا ہے۔
حکام کی جانب سے آؤٹو جزیرے کے قریب نمودار ہونے والے اس نئے جزیرے کی تصویر بھی جاری کی گئی ہے، اس تصویر میں ایک دھماکے کے بعد سیاہ راکھ کے بادل کو جزیرے کے اوپر پھیلتے دکھایا گیا ہے۔
جاپان کی میٹرولوجیکل ایجنسی کا کہنا ہے کہ اس جزیرے کا قطر تقریباً 100 میٹر ہے اور یہ سمندر سے 20 میٹر کی بلندی پر ہے۔
حکام کا کہنا ہے کہ حالیہ کچھ برسوں سے Iwo Jima جزیرے کے قریب آتش فشاں پھٹنے کی سرگرمیوں میں اضافہ دیکھنے میں آیا ہے لیکن اس کے نتیجے میں ایک نئے جزیرے کی تشکیل ایک اہم پیش رفت ہے۔
ماہرین کا کہنا ہے کہ یہ جزیرہ زیادہ دیر تک اپنی حیثیت برقرار نہیں رکھ پائے گا۔
