لندن: (ویب ڈیسک) برطانوی خاتون منفرد طرز زندگی اپنانے کی وجہ سے توجہ کا مرکز بن گئی۔
برطانوی نشریاتی ادارے کے مطابق فولے نامی برطانوی خاتون کوئی پیسہ خرچ کئے بغیر پرتعیش گھروں میں قیام سے لطف اندوز ہوتی ہے جس کیلئے اُس کو کرایہ بھی ادا نہیں کرنا پڑتا بلکہ الٹا لوگ خود اس کو معاوضہ ادا کرتے ہیں۔
سوشل میڈیا پر فولے نے اپنے کام کی تفصیلات شیئر کرتے ہوئے بتایا کہ وہ دراصل گھروں کی دیکھ بھال کا کام کرتی ہے جب مالکان دور ہوں یا جائیداد کا انتظام کرنے سے قاصر ہوں، اس کام کے ذریعے وہ پورے برطانیہ کا سفر کر چکی ہے۔
فولے کے مطابق گزشتہ تین ماہ کے دوران وہ چھ مکانات میں رہ چکی ہے جن میں ڈیون میں ایک گھر، رچمنڈ میں ایک شاندار ٹاؤن ہاؤس اور مشرقی لندن میں ایئر بی این بی کی ایک سابقہ جائیداد بھی شامل تھی۔
خاتون کے مطابق اس نے ان تین مہینوں میں کرایہ اور کھانے کے اخراجات کی مد میں ہزاروں پاؤنڈز کی بچت کی کیونکہ گھر کے مالکان اکثر اس کیلئے کھانا فراہم کرتے تھے جس کے عوض وہ ان کے گھروں اور پالتو جانوروں کی دیکھ بھال کرتی تھی۔
فولے کے اس کام پر سوشل میڈیا صارفین نے گہری دلچسپی کا اظہار کیا اور انہوں نے فولے سے سوال کیا کہ وہ ہمیں بھی بتائیں کہ اس طرح کی نوکری وہ کس طرح حاصل کرسکتے ہیں۔
