بلیک پول: (ویب ڈیسک) برطانیہ میں باتیں کرنے والے ایک مینگو نامی طوطے نے منشیات فروشی کے ایک بڑے گینگ کو لمبے عرصے کے لیے جیل پہنچا دیا ہے۔
برطانوی ڈیلی ڈیل کے مطابق پولیس نے ایک گھر پر چھاپہ مارا تو وہاں سے کوکین، ہیروئن، نقدی اور فون برآمد ہوئے، اسی کے ساتھ ایک ویڈیو بھی ملی جس میں گینگ لیڈر ایڈم گارنیٹ کی گرل فرینڈ شینن ہلٹن اپنے طوطے کو ایک بچے کے سامنے یہ سکھا رہی تھی کہ ٹو فار 25 یعنی دو چیزیں 25 پاؤنڈ میں جوکہ منشیات بیچنے کا کوڈ تھا۔
ایک اور ویڈیو میں مینگو نوٹوں سے کھیل رہا تھا جو نشے کے کاروبار سے کمائے گئے تھے۔
برطانوی پولیس نے مزید بتایا کہ اصل کہانی تب شروع ہوئی جب جیل میں پہلے سے سزا کاٹ رہے ایڈم گارنیٹ کے سیل کی تلاشی کے دوران کئی موبائل فون اور وائی فائی راؤٹرز ملے، وہ جیل کے اندر بیٹھ کر اپنے 14 ساتھیوں کو ہدایات دے رہا تھا، پولیس کو اس کے نائب دلبیر سندھو اور جیسن گیرینڈ اور گرل فرینڈ شینن ہلٹن کے گھروں سے منشیات، نقدی اور مزید ثبوت ملے۔
پولیس کے مطابق مزید ویڈیوز میں ہلٹن اور گارنیٹ کے درمیان ویڈیو کالز کے شواہد بھی ملے جس سے ملزمان کے خلاف گھیرا مزید تنگ ہوگیا اور ان کے لیے جھوٹ بولنا ممکن نہیں رہا، بالآخر عدالت کے سامنے تمام ملزمان کو اعتراف جرم کرنا پڑا۔
اب عدالت نے تمام ملزمان کو سخت سزائیں سنا دی ہیں جس میں گینگ کے سرغنہ ایڈم گارنیٹ کو 19 سال 6 ماہ قید ، شینن ہلٹن کو 12 سال قید، دلبیر سندھو کو 10سال قید اور جیسن گیرینڈ کو 8 سال 3 ماہ قید کی سزا دی گئی ہے۔
