واشنگٹن: (دنیا نیوز) امریکی ریاست میری لینڈ میں چھوٹا طیارہ گھر پر گر کر تباہ ہو گیا جس سے ایک شخص ہلاک ہو گیا۔
میری لینڈ میں چھوٹا طیارہ پرواز کے کچھ ہی دیر بعد قریبی علاقے میں گھر کے قریب آ گرا، آٹھ مسافروں کی گنجائش والے اس طیارے میں گرتے ہی آگ لگ گئی جس سے گھر اور قریب موجود گاڑی تباہ ہو گئی۔
خوش قسمتی سے حادثے کے وقت گھر میں کوئی موجود نہ تھا تاہم طیارے میں سوار ایک شخص موقع پر ہلاک ہو گیا، حکام نے موقع پر پہنچ کر جائے حادثہ کو سیل کر دیا اور امدادی کارروائیاں شروع کر دیں جبکہ فائر بریگیڈ کے اہلکار کچھ دیر بعد آگ بجھانے میں کامیاب ہو گئے۔ وفاقی اداروں نے حادثے کی تحقیقات شروع کر دیں۔
