نورسلطان: (ویب ڈیسک) قازقستان میں فوجی اڈے پر خوفناک دھماکوں میں 9 اہلکار چل بسے ہیں جبکہ درجنوں افراد زخمی ہو گئے ہیں۔
غیر ملکی میڈیا کے مطابق قازقستان کے جنوبی علاقے میں واقع فوجی اڈہ 10 خوفناک دھماکوں سے گونج اُٹھا۔ دھماکوں کیساتھ ہی فوجی اڈے میں خوفناک آگ بھڑک اُٹھی، فضا میں دھوئیں کے سیاہ بادل چھا گئے۔
قازغستان کی فوج کے ترجمان کا کہنا ہے کہ دھماکے میں 9 فوجی اہلکار ہلاک اور 60 سے زائد زخمی ہوگئے ہیں۔ ابھی یہ واضح نہیں کہ دھماکوں کی وجہ کیا تھی تاہم دھماکے اس جگہ ہوئے جہاں انجینیئرنگ شعبے میں کام آنے والا دھماکا خیز مواد ذخیرہ کیا گیا تھا۔
BREAKING: Massive explosion rocks military warehouse near Taraz, Kazakhstan pic.twitter.com/n3KBIeTZ0k
— BNO News (@BNONews) August 26, 2021
دھماکوں کے بعد آس پاس کا علاقہ خالی کرا لیا گیا جبکہ ہلاک اور زخمی ہونے والوں کو ملٹری ہسپتال منتقل کردیا گیا ہے جہاں متعدد زخمیوں کی حالت نازک بتائی جارہی ہے۔ ہلاکتوں میں اضافے کا خدشہ ظاہر کیا جا رہا ہے۔
قازغستان کے وزارت دفاع کی جانب سے جاری بیان میں کہا گیا ہے کہ فوجی اڈے پر ہونے والے دھماکوں میں دہشت گردی کے عنصر کے ملوث ہونے کے شواہد نہیں ملے ہیں۔ واقعے کی تحقیقات کے لیے انکوائری کمیٹی تشکیل دیدی گئی ہے۔