کابل: (ویب ڈیسک) افغانستان سے ایک اور افسوسناک خبر آئی ہے جہاں پر ہرات اور ہلمند میں 2 بم دھماکوں میں 6 بچوں سمیت 11 افراد جاں بحق ہوگئے۔
افغان میڈیا کے مطابق ہرات میں کھیل کے ایک میدان میں اس وقت دو بم دھماکے ہوئے جب وہاں نوجوان اور بچے کھیل رہے تھے۔ میدان میں دو بم اور بھی نصب تھے جنھیں بم ڈسپوزل کے عملے نے ناکارہ بنادیا۔
ہرات میں بیک وقت 2 بم دھماکوں میں ایک بچہ اور 5 نوجوان جاں بحق ہوگئے جبکہ 3 لڑکے شدید زخمی ہوگئے جنھیں قریبی ہسپتال منتقل کردیا گیا۔ زخمیوں کی حالت خطرے سے باہر بتائی جاتی ہے۔
ہلمند میں بھی کھیل کے ایک میدان میں مارٹر گولہ پڑا تھا جسے ناکارہ سمجھ کر بچے کھیل رہے تھے اور اسی دوران گولہ زوردار دھماکے سے پھٹ گیا جس کے نتیجے میں 5 بچے جاں بحق ہوگئے۔ طالبان اہلکاروں نے دونوں واقعات کے بعد جائے وقوعہ کو گھیرے میں لے لیا۔
