ریاض: (دنیا نیوز) سعودی عرب کے علاقے نجران میں 12 سالہ بیٹے نے گاڑی چلانے کی تربیت کے دوران والد کو کچل دیا۔
میڈیا رپورٹ کے مطابق نجران ریجن کی پولیس نے بتایا کہ کنٹرول روم میں اطلاع ملی کہ شاہ فہد تفریح گاہ میں ایک شخص گاڑی کی ٹکر سے شدید زخمی ہے، جس پر امدادی ٹیم فوری طور پر جائے حادثہ پر پہنچ گئی، زخمی شخص کو تشویشناک حالت میں گاڑی کے نیچے سے نکالا گیا۔
ریسکیو ٹیم نے بتایا کہ جب متاثرہ شخص کو نکالا گیا تو اس کی دل کی دھڑکن بند ہو چکی تھی جبکہ سانس بھی نہیں آرہی تھی، اسے فوری طبی امداد فراہم کرتے ہوئے مصنوعی سانس دینے کی کوشش کی بعد ازاں اسے ہسپتال منتقل کیا گیا مگر وہ جانبر نہ ہو سکا۔
ابتدائی تحقیقات کے بعد پولیس نے بتایا کہ شاہ فہد تفریح گاہ کے کچے میدان میں ایک شخص اپنے 12 سالہ بیٹے کو گاڑی چلانا سیکھا رہا تھا، بیٹے کو ابتدائی تربیت دینے کے بعد وہ خود گاڑی سے اتر گیا اور دور کھڑے ہو کر بیٹے کو گاڑی چلاتا دیکھنے لگا اس دوران گاڑی قابو سے باہر ہو گئی اور انتہائی تیز رفتاری سے سامنے کھڑے والد پر چڑھ گئی۔
