غزہ: (دنیا نیوز) لبنان کے سرحی قصبے اور غزہ میں اسرائیلی بمباری میں 2 صحافی شہید جبکہ 3 زخمی ہوگئے۔
لبنان کے سرحی قصبے پر اسرائیلی بمباری کے نتیجے میں برطانوی خبر رساں ادارے کا صحافی ایسام عبداللہ شہید اور چار دیگر صحافی زخمی ہوگئے جبکہ غزہ میں ویڈیو بناتے ہوئے فلسطینی صحافی محمد شہاب کے گھر پر بھی بم گر گیا اور وہ شہید ہوگئے۔
عالمی میڈیا میں شائع ہونے والی رپورٹس کے مطابق جنوبی لبنان کے سرحدی قصبے الما الشاب میں صحافی اسرائیل اور حزب اللہ کے درمیان جاری لڑائی کی کوریج کررہے تھے کہ اسی دوران اسرائیلی طیاروں نے قصبے پر بمباری کردی۔
— Younis Tirawi | يونس (@ytirawi) October 13, 2023
بمباری کی زد میں آکر برطانوی خبر رساں ادارے رائٹرز سے منسلک صحافی ایسام عبداللہ جاں بحق ہوگئے جبکہ اے ایف پی اور الجزیرہ سے وابستہ صحافی زخمی ہوئے۔
دوسری جانب سوشل میڈیا پر فلسطینی صحافی محمد شہاب کی ایک ویڈیو وائرل ہے جو انہوں نے اپنی شہادت سے قبل بنائی، ویڈیو کے دوران وہ غزہ کی صورتحال کا بتا رہے ہیں اسی دوران ایک اسرائیلی میزائل ان کے گھر پر گرتا ہے اور وہ شہید ہوجاتے ہیں۔
— ترکیہ اردو (@TurkiyeUrdu_) October 13, 2023
اپنی آخری ویڈیو میں شہید صحافی نے بتایاکہ یہ میری آخری ویڈیو ہوسکتی ہے اور میرا دنیا بھر کیلئے پیغام ہے کہ اسرائیل کی جانب سے ہمارا کھانا، پانی اور بجلی سب بند کردیا گیا ہے، انہوں نے کہا کہ ہم اپنے گھروں کو بھی نہیں چھوڑ سکتے کیونکہ یہ ہمیں (اسرائیل) گھر کے اندر اور باہر مار رہے ہیں۔
