لاہور: (ویب ڈیسک) عالمی شہرت یافتہ آنجہانی خاتون نجومی بابا وانگا نے آنے والے سال 2024ء کے حوالے سے بھی پیش گوئیاں کر رکھی ہیں جس کی تفصیلات سامنے آ گئی۔
غیر ملکی خبر رساں ادارے کے مطابق 91 سال کی عمر میں 1996ء میں انتقال کر جانے والی بلغاریہ کی خاتون نجومی بابا وانگا کے بارے میں کہا جاتا ہے کہ وہ روحانی صلاحیتوں سے مالا مال تھیں ان کی دنیا سے متعلق کی گئی متعدد پیش گوئیاں درست ثابت ہو چکی ہیں۔
بابا وانگا نے پیش گوئیاں اپنی موت سے قبل کی تھیں، انہوں نے سال بہ سال ہونے والے مستقبل کے واقعات کو پہلے ہی بیان کر دیا تھا، بابا وانگا کی پیش گوئیاں 1989ء سے 5079ء تک کیلئے ہیں، انہوں نے 5079ء کو دنیا کے اختتام کا سال قرار دے رکھا ہے۔
بابا وانگا نے سال 2024ء سے متعلق جو پیش گوئیاں کر رکھی ہیں ان میں سب سے بڑی پیش گوئی روسی صدر ولادیمیر پیوٹن کی موت ہے، انہوں نے اگلے سال روسی صدر کی قاتلانہ حملے میں موت کی پیش گوئی کر رکھی ہے۔
دوسری پیش گوئی میں بابا وانگا نے یورپ میں دہشت گرد حملوں کے بارے میں خبردار کیا ہے اور ساتھ ہی یہ کہا ہے کہ ایک بڑا ملک 2024ء میں حیاتیاتی ہتھیاروں کے ٹیسٹ یا حملے کرے گا، بابا وانگا نے عالمی معاشی بحران پیدا ہونے کی پیش گوئی بھی کی ہے۔
بابا وانگا نے آئندہ سال خوفناک موسمی واقعات اور قدرتی آفات رونما ہونے کے حوالے سے بھی خبردار کیا ہے، سال 2024ء میں سائبر حملوں میں بھی اضافہ ہو گا، اعلیٰ درجے کے ہیکرز پاور گرڈز اور واٹر ٹریٹمنٹ پلانٹس جیسے اہم انفراسٹرکچر کو نشانہ بنائیں گے۔
2024ء میں بابا وانگا نے الزائمر اور کینسر سمیت لاعلاج بیماریوں کے علاج دریافت ہونے کے حوالے سے بھی بتایا ہے، آئندہ سال کوانٹم کمپیوٹنگ میں اہم پیشرفت بھی ہوگی۔
واضح رہے کہ بابا وانگا کی نائن الیون حملوں، شہزادی ڈیانا کی موت، سویت یونین کے خاتمے اور 2004ء میں تھائی لینڈ کے سونامی جیسی بڑی پیش گوئیاں پوری ہو چکی ہیں، 2022ء میں خطرناک زلزلے، سیلاب اور پینے کے پانی کی قلت کی پیش گوئی بھی سچ ثابت ہو چکی۔
بابا وانگا نے 2023ء میں ایک بڑے جوہری پاور پلانٹ میں دھماکے کی پیش گوئی بھی کی تھی جس سے ایشیا میں زہریلے بادل چھا جائیں گے اور ہزاروں افراد بیمار پڑ جائیں گے تاہم اب سال اختتام کے قریب پہنچ چکا ہے لیکن تاحال یہ پیش گوئی سچ ثابت نہیں ہوئی۔
بابا وانگا کا یہ بھی کہنا تھا کہ 2023ء میں قدرتی طور پر بچے پیدا کرنے پر پابندی عائد ہو جائے گی اور 2023ء کی نسل کو لیبارٹری میں تیار کیا جائے گا، والدین بچوں کے رنگ اور خصوصیات بھی خود منتخب کریں گے اور لیبارٹری میں بالکل ان کی پسند کے مطابق بچے تیار ہوں گے۔
