نئی دہلی: (دنیا نیوز) انتہا پسند بھارتی وزرا اور بھارتی فوج کے ریٹائرڈ افسران آمنے سامنے، آپریشن بنیان مرصوص میں ذلت آمیز ناکامی پر انتہا پسند بھارتی وزراء نے بھارتی فوج کے خلاف ہرزہ سرائی شروع کر دی۔
ذرائع کے مطابق کرنل صوفیہ قریشی پر تنقید کے حوالے سے میجر جنرل (ر) شریواستو سمیت دیگر سابق فوجی افسران نے بھارتی وزراء کو آڑے ہاتھوں لیا، ریٹائرڈ بھارتی فوجی افسروں نے کہا ہے کہ بھارتی فوج کی توہین کرنے والے وزیروں کو مودی برطرف کیوں نہیں کر رہے؟۔
میجر جنرل (ر) شریواستو نے کہا کہ مدھیہ پردیش کے وزیر وجے شاہ اور نائب وزیر اعلیٰ جگدیش دیوڈا فوج پر کیچڑ اچھال رہے ہیں جبکہ مودی خاموش تماشائی ہیں، فوج صرف بھارت ماتا کے سامنے جھکتی ہے، مودی جیسے سیاستدانوں کے قدموں میں نہیں۔
انہوں نے کہا کہ مودی کے قدموں میں فوج کو جھکانے کا بیان شرمناک اور ناقابل قبول ہے، مدھیہ پردیش کے وزراء فوج کی قربانیوں کا مذاق اڑا رہے ہیں، فوج میں کرنل صوفیہ قریشی جیسے افسران قوم کا فخر ہیں، مودی حکومت ان پر بھی حملہ آور ہو رہی ہے۔
ریٹائرڈ افسران کا کہنا تھا کہ جو فوج کی تذلیل کرے وہ وزیر نہیں بلکہ مودی کا ترجمان ہے، مودی حکومت کی خاموشی ثابت کرتی ہے کہ وہ فوج کی توہین میں شریک ہے۔
انہوں نے کہا کہ فوج پر حملے ہو رہے ہیں اور مودی سرکار تماشائی بنی ہوئی ہے، فوجی ادارے مودی کی غلامی کے لیے نہیں، قوم کے تحفظ کے لیے ہیں۔
دفاعی ماہرین کا کہنا ہے کہ فوجی اداروں کو سیاسی غلام بنانا مودی سرکار کا خطرناک ایجنڈا ہے، بنیان مرصوص میں بھارتی شکست ثابت کرتی ہے کہ بھارتی فوج صرف میڈیا پر طاقتور ہے۔
انہوں نے کہا کہ مودی کی ضد اور غرور نے بھارت کو سفارتی و عسکری محاذ پر تنہا کر دیا ہے، پاکستانی فوج نے پیشہ ورانہ مہارت سے بھارت اور بھارتی فوج کا جنگی غرور خاک میں ملایا۔
