آسام : (ویب ڈیسک) جنگی جنون میں مبتلا بھارت نے اپنے پڑوسی ملک کی خود مختاری اور بین الاقوامی قوانین کی خلاف ورزی کرتے ہوئے میانمار میں ڈرون حملے کر دیے۔
غیر ملکی خبر رساں ایجنسی کے مطابق بھارتی علیحدگی پسند تنظیم یونائیٹڈ لبریشن فرنٹ آف آسام (اُلفا) نے اعلان کیا ہے کہ بھارتی فوج نے سرحد پار میانمار میں تنظیم کے کیمپ پر ڈرون حملے کیے ہیں۔
بھارتی تنظیم الفا کا کہنا ہے کہ بھارت نے میانمار میں ڈرون حملہ کر کے ہمارے 3 کمانڈروں اور 20 ارکان کو ہلاک کر دیا، یونائیٹڈ لبریشن فرنٹ آف آسام بھارتی ریاست آسام کی آزادی کے لیے جدوجہد کر رہی ہے۔
تنظیم کا کہنا ہے کہ بھارتی فوج نے حملوں میں اسرائیلی ساختہ ڈیڑھ سو ڈرون استعمال کیے، بھارتی فوج اروناچل پردیش کے کیمپوں سے حملے کر رہی ہے، اُلفا گروپ نے اعلان کیا ہے کہ بھارتی فوج کے وحشیانہ حملوں کا بدلہ ضرور لیں گے۔
دوسری جانب بھارتی وزارتِ دفاع نے میانمار پر ڈرون حملے کی تردید کرتے ہوئے کہا کہ میانمار میں ڈرون اور میزائل حملوں کی کوئی اطلاعات نہیں ہیں۔
