بوگوتا: (ویب ڈیسک) کولمبیا میں فوجی قافلے پر ڈرون حملے میں 3 اہلکار ہلاک جبکہ 8 شدید زخمی ہوگئے۔
عالمی خبر رساں ادارے کے مطابق واقعہ کولمبیا کے شمال مشرقی علاقے میں پیش آیا، حملہ باغیوں نے کیا، کولمبیا کی فوج کے ترجمان نے حملے میں 3 اہلکاروں کی ہلاکت کی تصدیق کرتے ہوئے حملے کا ذمہ دار نیشنل لبریشن آرمی (ELN) کو ٹھہرایا ہے۔
مقامی میڈیا نے دعویٰ کیا ہے کہ نیشنل لبریشن آرمی نے اس حملے کی ذمہ داری قبول کرلی ہے تاہم آزاد ذرائع اس کی تصدیق نہیں ہوسکی، خیال رہے کہ علیحدگی پسند مسلح تنظیم نیشنل لبریشن آرمی کولمبیا میں 1960 سے ریاست کے خلاف مسلح جدوجہد کر رہی ہے۔
یاد رہے کہ مسلح تنظیم اور حکومت کے درمیان امن مذاکرات کے کئی دور ہوئے تاہم جنوری 2025 میں حکومت نے اس تنظیم کے ساتھ امن مذاکرات معطل کر دیے تھے، حکومت نے امن مذاکرات اُس وقت معطل کیے تھے جب ایک حملے میں 80 سے زائد افراد ہلاک اور 50 ہزار سے زیادہ لوگ بے گھر ہوگئے تھے۔
واضح رہے کہ کولمبیا میں منشیات فروشوں کے عالمی گروپس، جرائم پیشہ گروہوں اور نسلی تنظیموں کا خطرناک نیٹ ورک حکومتی فورسز پر حملوں میں ملوث رہے ہیں۔
