تہران: (دنیا نیوز) شمال مشرقی ایران میں مسلح افراد نے عدالتی کمپاؤنڈ پر حملہ کر دیا جس سے 6 افراد جاں بحق اور 20 زخمی ہو گئے، 3 حملہ آور بھی مارے گئے۔
ایرانی میڈیا نے رپورٹ کیا کہ حملہ سیستان بلوچستان کے شہر زاہدان میں کیا گیا، مسلح افراد عدالتی کمپاؤنڈ میں گھس کر ججوں کے چیمبرز میں فائرنگ کرتے رہے۔
سرکاری میڈیا میں بتایا گیا ہے کہ سکیورٹی اہلکاروں نے جوڈیشل کمپاؤنڈ کو گھیرے میں لے لیا ہے جبکہ ریسکیو ٹیمیں بھی موقع پر پہنچ گئی ہیں، جیش العدل نامی مسلح گروہ نے زاہدان میں جوڈیشل کمپلیکس پر ہونے والے حملے کی ذمہ داری قبول کر لی ہے۔
سردشت میں بھی سکیورٹی اہلکاروں پر حملہ
مہر نیوز کے مطابق ایران کے مغربی آذربائیجان صوبے کے شہر سردشت کے قریب واقع گاؤں اغلان میں پاسدارانِ انقلاب کے اڈے پر دہشت گرد حملے میں ایک اہلکار شہید اور دوسرا زخمی ہو گیا۔
پاسدارانِ انقلاب کی مغربی آذربائیجان شہدا بیس کے شعبہ تعلقات عامہ کے سربراہ کرنل شاکر نے اعلان کیا کہ چند گھنٹے قبل دہشت گرد گروہ کے ارکان نے سردشت کے قریب اغلان گاؤں میں واقع اڈے پر اندھا دھند فائرنگ کی، جس کے نتیجے میں ایک اہلکار شہید اور دوسرا زخمی ہو گیا۔
انہوں نے مزید تفصیلات فراہم کیے بغیر کہا کہ یہ حملہ خطے میں موجود پاسداران انقلاب کے فوجی اڈے کو نشانہ بنانے کے لیے کیا گیا۔
