سعودیہ نے صومالیہ کی ترقی اور سلامتی کیلئے مزید بین الاقوامی تعاون ناگزیر قرار دیدیا

دوحہ: (ویب ڈیسک) سعودی عرب نے صومالیہ کی ترقی، استحکام اور سلامتی کیلئے مزید بین الاقوامی تعاون ناگزیر قرار دیدیا۔

سعودی عرب کے نائب وزیرخارجہ انجینئر ولید الخریجی نے گزشتہ روز قطر کے دارالحکومت دوحہ میں صومالیہ سے متعلق او آئی سی کے رابطہ گروپ کے اجلاس میں خطاب کرتے ہوئے صومالیہ کے لئے ترقیاتی و طویل المدتی منصوبوں کی اہمیت کو اجاگر کیا۔

سعودی نائب وزیر خارجہ نے مزید کہاکہ مملکت کی جانب سے شاہ سلمان ریلیف سینٹر کے ذریعے امدادی اور انسانی بنیادوں پر فلاحی امور کی انجام دہی جاری رہے گی جو ہمارے صومالی بھائیوں کی مدد اور ترقیاتی امور کو بہتر بنانے اور انسانی مشکلات کے خاتمے میں معاون ہیں۔

انہوں نے ترکیہ میں ہونے والے صومالیہ اور ایتھوپیا کے درمیان مفاہمتی معاہدے کا خیرمقدم کرتے ہوئے اسے دونوں ممالک کے درمیان امن کی بنیاد پر ترقی و استحکام کے نئے دور کا آغاز قرار دیا۔

انجینئر ولید الخریجی نے مملکت کی جانب سے استحکام کو نقصان پہنچانے اور قومی یکجہتی کو غیرمستحکم کرنے کے لئے ہونے والے حملوں کی شدید مذمت کرتے ہوئے کہا کہ انتہا پسندی سے نمٹنے کے لئے اجتماعی کوششوں کی ضرورت ہے۔

انہوں نے ان حملوں کو ملکی وحدت و پائیدارترقی کے لئے نقصان دہ قرار دیا، انہوں نے برادر ملک صومالیہ کو اقوام متحدہ کی سلامتی کونسل کی دو سالہ غیر مستقل رکنیت کے حصول کو سراہتے ہوئے اسے صومالیہ کے لئے عالمی طورپر مثبت اقدام قرار دیا۔