آکلینڈ، سڈنی: (دنیا نیوز) آسٹریلوی وزیراعظم کی جانب سے فلسطین کو تسلیم کرنے کے اعلان کے بعد نیوزی لینڈ نے بھی ستمبر میں فلسطینی ریاست کو تسلیم کرنے پر غور شروع کر دیا۔
نیوزی لینڈ کے وزیر خارجہ نے کہا کہ فلسطینی ریاست کو تسلیم کرنے پر غور کر رہے ہیں، وزیر اعظم کرسٹوفر لکسن کی کابینہ ستمبر میں باضابطہ فیصلہ کرے گی۔
کیوی وزیر خارجہ ونسٹن پیٹرز نے کہا کہ فلسطینی ریاست کو تسلیم کرنا وقت کی ضرورت ہے۔
ادھر آسٹریلیا کے وزیراعظم انتھونی البانیز نے پارلیمنٹ ہاؤس میں کابینہ اجلاس کے بعد میڈیا سے گفتگو کرتے ہوئے البانیز نے کہا کہ ستمبر میں اقوام متحدہ کی جنرل اسمبلی کے 80ویں اجلاس میں آسٹریلیا فلسطینی ریاست کو باقاعدہ تسلیم کرے گا۔
یہ فیصلہ اس وقت سامنے آیا ہے جب اسرائیلی وزیراعظم بنیامین نیتن یاہو نے بعض یورپی ممالک کو فلسطین کو تسلیم کرنے کے ارادے کو شرمناک قرار دیتے ہوئے تنقید کا نشانہ بنایا تھا۔
دوسری طرف فلسطین کی مزاحمتی تنظیم حماس نے واضح کیا ہے کہ جب تک ایک آزاد اور مکمل خودمختار فلسطینی ریاست قائم نہیں ہو جاتی ہتھیار نہیں ڈالے جائیں گے۔
عرب میڈیا کے مطابق حماس اور اسرائیل کے درمیان غزہ میں 60 روزہ جنگ بندی اور یرغمالیوں کی رہائی کے معاہدے کے لیے ہونے والے بالواسطہ مذاکرات گزشتہ ہفتے کسی نتیجے کے بغیر ختم ہوگئے ہیں۔
