غزہ: (ویب ڈیسک) اسرائیلی فوج نے آج النصر ہسپتال کو باقاعدہ نشانہ بنایا جس سے ڈیوٹی پر موجود 4 صحافیوں سمیت 15 افراد کی شہادت ہوئی۔
رپورٹ میں بتایا گیا ہے کہ شہید ہونے والے صحافیوں میں غیرملکی خبرایجنسی رائٹرز کا کیمرامین حسام المصری، امریکی خبرایجنسی ایسوسی ایٹڈپریس اور برطانوی اخبار دی انڈیپینڈنٹ کی نامہ نگار مریم ابودقہ، امریکی ٹی وی این بی سی نیٹ ورک کا صحافی ابوطحٰہ اور الجریزہ کے فوٹو جرنلسٹ محمدسلامہ شامل ہیں۔
عرب میڈیا کے مطابق اسرائیلی فوج اور وزیراعظم آفس نے النصر ہسپتال پرحملے سے متعلق فوری ردعمل سےگریز کیا ہے۔
رپورٹ کے مطابق 4 مزید صحافیوں کی شہادت کے بعد غزہ میں اکتوبر 2023 سے اسرائیلی حملوں میں جان کی بازی ہارنے والے صحافیوں کی تعداد اب 244 ہوگئی ہے۔
24 گھنٹوں میں 66 فلسطینی شہید
قبل ازیں قطری نشریاتی ادارے کے مطابق غزہ پر اسرائیلی بمباری میں 24 گھنٹوں کے دوران 51 فلسطینی شہید ہوئے ہیں۔
شمالی غزہ میں اسرائیلی ٹینکوں نے گولہ باری اور جنوبی اور وسطی حصوں میں باقاعدہ بمباری کی جس کے نتیجے میں ہزار سے زائد عمارتیں مکمل تباہ ہو گئیں، یہ بمباری غزہ پر مکمل قبضہ کی طرف پیش قدمی قرار دی جا رہی ہے۔
اسرائیلی حملوں میں جاں بحق ہونے والوںڈ میں امداد کے متلاشی 24 افراد بھی شامل ہیں، اس کے علاوہ بھوک کی شدت سے بھی مزید 8 فلسطینی انتقال کر گئے جس کے بعد غذائی قلت سے اموات 115 بچوں سمیت 289 ہوگئیں۔
واضح رہے کہ اسرائیلی حملوں کے نتیجے میں غزہ میں شہدا کی مجموعی تعداد 62 ہزار 600 سے زائد ہوگئی جبکہ ایک لاکھ57 ہزارسے زائدافراد زخمی ہوچکے ہیں۔
دوسری جانب اسرائیلی فوجیوں نے مقبوضہ مغربی کنارے کے علاقے رام اللہ میں 14 فلسطینیوں کو گرفتار کرلیا۔
ادھر فلسطینی ریاست کی حمایت پر اسرائیل نے فرانس اور دیگر یورپی ممالک کو وارننگ دی ہے، اسرائیلی وزیر خارجہ نے کہا کہ یورپ کو اسرائیل اور حماس میں سے کسی ایک کو چُننا ہوگا۔
علاوہ ازیں یمن کے دارالحکومت صنعا پر اسرائیلی فضائی حملوں میں 6 افراد جاں بحق اور 67 زخمی ہوگئے، صنعا میں درجنوں اسرائیلی طیاروں نے صدارتی کمپلیکس کے نزدیک میزائل اور ایندھن کے گودام اور پاوراسٹیشن پر بمباری کی۔
سرائیلی فوج نے مضحکہ خیز دعویٰ کیا کہ اس نے صنعا میں صدارتی محل والے فوجی کمپاؤنڈ، 2 بجلی گھروں اور ایک فیول ڈپو کو نشانہ بنایا، یہ حملےحوثیوں کی جانب سے اسرائیل اور اس کے شہریوں پر بار بار کیے جانے والے حملوں کے جواب میں کیے گئے۔
یاد رہے کہ2 روز قبل یمن سے اسرائیل پر میزائل حملہ ہوا تھا جسے اسرائیل نے ناکام بنانے کا دعویٰ کیا تھا۔
