میکسیکو: (دنیا نیوز) میکسیکو میں تیز رفتار بس مال بردار ٹرین کی زد میں آگئی، حادثے میں 10 افراد ہلاک اور 61 زخمی ہوگئے۔
خبر ایجنسی کے مطابق حادثہ دارالحکومت میکسیکو سٹی سے 115 کلومیٹر دور شمال مغرب میں واقع ایک قصبہ کے قریب صنعتی زون میں پیش آیا۔
ریاست میکسیکو کے اٹارنی جنرل نے غیرملکی میڈیا کو بتایا کہ ہلاک ہونے والوں میں 7 خواتین اور 3 مرد شامل ہیں، زخمیوں میں سے کچھ افراد کی حالت تشویشناک ہے۔
میڈیا رپورٹ کے مطابق ٹرین آپریٹر کا بتانا ہے کہ بس ڈرائیور نے چلتی ٹرین کے سامنے سے جلد بازی میں گزرنے کی کوشش کی جس کے باعث حادثہ پیش آیا۔
خبر ایجنسی نے مزید بتایا کہ ریلوے حکام نے متاثرین کے اہل خانہ سے اظہار تعزیت کرتے ہوئے ڈرائیوروں سے کہا کہ وہ سڑک پر لگے اشاروں کا احترام کریں اور ٹرین کراسنگ کے احکامات پر عمل کریں۔
