واشنگٹن، دوحہ، یروشلم: (ویب ڈیسک) قطر پر اسرائیلی حملے کے بعد امریکی صدر ٹرمپ نے اسرائیلی وزیراعظم سے فون پر گفتگو کی اور ناراضی کا اظہار کیا۔
امریکی اخبار کی رپورٹ کے مطابق ٹرمپ نے قطر میں اسرائیلی حملے کا نیتن یاہو کا فیصلہ غیر دانشمندانہ قرار دیا۔، امریکی صدر نے نیتن یاہوسے پوچھا کہ کیا حملہ کامیاب رہا؟
نیتن یاہو کا کہنا تھا کہ انہیں ایک موقع ملا تھا اسی لیے کارروائی کی۔
نیتن یاہو کو اپنے عمل کا حساب دینا ہوگا: قطر
قطری وزیراعظم شیخ محمد بن عبدالرحمان الثانی نے کہا ہے کہ اسرائیلی حملے نے یرغمالیوں کی رہائی کی تمام امیدیں ختم کر دی ہیں۔
امریکی ٹی وی کو دیے گئے انٹرویو میں قطری وزیراعظم شیخ محمد بن عبدالرحمان الثانی نے کہاکہ بین الاقوامی قوانین کی خلاف ورزی پر نیتن یاہوکو انصاف کے کٹہرے میں لایا جانا چاہیے۔
انھوں نے کہا کہ اسرائیلی حملے نے یرغمالیوں کی رہائی کی تمام امیدیں ختم کر دیں، حماس پر اسرائیلی حملے سے یرغمالیوں کا مستقبل تاریک ہوگیا ہے۔
قطری وزارت خارجہ نے اسرائیلی وزیر اعظم بنیامین نیتن یاہو کےقطر میں حماس کے دفتر سے متعلق بیانات غیرذمہ دارانہ قرار دے دیے۔
غیر ملکی خبر رساں ایجنسی کے مطابق قطری وزارت خارجہ نے کہا ہے کہ نیتن یاہو کی دھمکیاں بین الاقوامی قوانین کی خلاف ورزی ہیں، نیتن یاہو کو اپنے عمل کا حساب دینا ہوگا۔
قطر کی وزارت خارجہ کے مطابق اسرائیلی وزیر اعظم نیتن یاہو کےقطرمیں حماس کے دفتر سے متعلق بیانات غیرذمہ دارانہ ہیں۔
اسرائیلی وزیر اعظم نیتن یاہو کا بیان
اسرائیلی وزیراعظم بنیامین نیتن یاہو نے کہا تھاکہ قطرحماس قیادت کو ملک سے نکالے یا قانون کے کٹہرے میں لائے، مزید برآں اسرائیلی وزیراعظم نے قطر پر اسرائیلی حملے کو پاکستان میں اسامہ بن لادن کو نشانہ بنانے کے امریکی آپریشن سے تشبیہ دی تھی۔
اپنے ایک ویڈیو بیان میں نیتن یاہو نے یہ بھی کہا تھا کہ امریکا نے 11 ستمبر کے بعد دہشت گردوں کو ڈھونڈ نکالنے اور انہیں انجام تک پہنچانے کا عہد کیا چاہے وہ کہیں بھی ہوں اور سلامتی کونسل میں یہ قرار داد منظور کروائی کہ کوئی حکومت دہشت گردوں کو پناہ نہیں دے گی، ہم نے اسی اصول پر عمل کیا۔
نیتن یاہو نے کہا کہ ہم نے قطر میں ان دہشت گرد ماسٹر مائنڈز کو نشانہ بنایا جنہوں نے 7 اکتوبر کا قتلِ عام کیا، قطر انہیں پناہ دیتا ہے، ان کی مالی مدد کرتا ہے اور انہیں پرتعیش سہولیات فراہم کرتا ہے۔
امریکا میں اسرائیلی سفیر یچیل لیٹر کا بیان
دوسری جانب امریکا میں اسرائیلی سفیر یچیل لیٹرنے کہا ہے کہ اگراسرائیل قطر میں حماس رہنماؤں کونشانہ بنانے میں ناکام رہا ہےتواگلی بارکامیاب ہو جائیں گے، دہشت گردجہاں بھی ہوں گے نشانہ بنائیں گے، جو ہمیں مارے گا، ہم اسےماریں گے۔
