پیرس: (دنیا نیوز) فرانس میں حکومتی پالیسیوں اور معاشی بحران کے خلاف شدید مظاہرے کئے گئے۔
بجٹ کٹوتیوں، مہنگائی، پنشن اصلاحات پر لاکھوں افراد سڑکوں پر نکل آئے، پیرس سمیت مختلف شہروں میں عوامی مظاہروں کا سلسلہ زور پکڑ گیا، مظاہرین نے حکومت پر امیروں کو فائدہ پہنچانے کا الزام لگا دیا، مظاہرے میں اساتذہ، ٹرین ڈرائیورز، طلبہ، مزدور اور سرکاری ملازم بھی شامل ہوئے۔
پولیس اور مظاہرین میں جھڑپیں ہوئیں، درجنوں زخمی ہوگئے، سیکڑوں کو گرفتار کر لیا گیا، پولیس نے آنسو گیس اور واٹر کینن سے مظاہرین کو منتشر کیا، 80 ہزار سے زائد پولیس اہلکار کسی ناخوشگوار واقعے سے نمٹنے کیلئے تعینات کر دیئے گئے۔
مظاہرین نے مطالبہ کیا کہ پنشن اصلاحات واپس لی جائیں، امیروں پر ٹیکس لگایا جائے، مظاہرین نے نعرے لگاتے ہوئے کہاکہ عوامی خدمات کا بجٹ بحال کرو، صحت و تعلیم بچاؤ۔
واضح رہے کہ فرانسیسی حکومت پر بیرونی قرضوں اور غلط پالیسیوں کا شدید دباؤ ہے۔
