مقبوضہ بیت المقدس: (دنیا نیوز) یمن سے اسرائیل کے ساحلی شہر ایلات پر حوثیوں کے ڈورن حملے میں دو افراد ہلاک اور 20 اسرائیلی شہری زخمی ہوگئے ہیں۔
اسرائیلی میڈیا کے مطابق بیشتر افراد ڈرون کے دھماکے سے اڑنے والے چھروں کا نشانہ بنے ہیں جبکہ حملے کی فوٹیج جاری کردی گئی، زخمیوں میں دو افراد ایک 60 سالہ اور دوسرا 26 سالہ کی حالت تشویشناک ہے، جب کہ ایک 30 سالہ شخص کو درمیانے درجے کے زخم آئے ہیں، جبکہ دیگر 19 افراد معمولی طور پر زخمی ہوئے ہیں۔
یہ خبر بھی پڑھیں: صیہونی فورسز کے تازہ حملے، مزید 80 سے زائد فلسطینی شہید، درجنوں زخمی
اسرائیلی فوجی حکام کے مطابق ڈرون نچلی پرواز کرتا ہوا ایک ہوٹل کے قریب آ کر پھٹا، ڈرون کو مار گرانے آئرن ڈوم کے دو انٹرسیپٹر میزائل داغے گئے تھے جو ڈرون کو گرانے میں ناکام رہے۔
اسرائیل کے چینل 12 کے ساتھ ایک انٹرویو میں ایلات کے میئر ایلی لنکری نے حکومت سے مطالبہ کیا کہ حوثیوں کو سختی سے جواب دیا جائے، حوثی حملے ایلات کی بندرگاہ کی آپریشنز کو متاثر کر رہے ہیں۔
اسرائیلی فوج نے بتایا کہ حملے کو روکنے کی کوششیں کی گئی تھیں، لیکن مزید تفصیلات نہیں دی گئیں، اسرائیلی اخبار کے مطابق فضائی دفاعی نظام ڈرون کو روکنے میں ناکام رہا۔
خیال رہے کہ چند روز قبل بھی حوثیوں کی جانب سے داغا گیا ڈرون ایلات میں آکر گرا تھا۔
دوسری جانب غزہ میں اسرائیل کی وحشیانہ بمباری جاری ہے، 24 گھنٹوں میں مزید 84 فلسطینی شہید ہوگئے ہیں۔
عرب میڈیا کے مطابق اسرائیلی فوج نے پناہ گزین کیمپوں اور امدادی مراکز کو نشانہ بنایا ہے۔ غزہ شہر میں امداد کے منتظر 11 افراد سمیت 50 فلسطینی شہید ہوچکے ہیں۔
غزہ میں شہدا کی مجموعی تعداد 65 ہزار 419 ہوگئی ہے جبکہ ایک لاکھ 66 ہزار 795 فلسطینی زخمی ہوچکے ہیں۔
