راولپنڈی: (ویب ڈیسک) پاکستان پوسٹ نے یکم اگست سے ڈاک کے نرخوں میں اضافے کے بعد اس میں صنعتی و تاجر برادری، کاروباری حلقوں سمیت زیادہ ڈاک بک کرانے والے اداروں اور آن لائن کام کرنے والوں کی سہولت کیلئے خصوصی پیکجز بھی متعارف کروانے کا اعلان کیا ہے۔
ڈائریکٹر جنرل پاکستان پوسٹ حافظ شکیل احمد قریشی نے بتایا کہ عوام کو مارکیٹ کے مقابلے میں انتہائی ارزاں نرخوں پر سروسز مہیا کر رہے ہیں، ایک لفافہ ملک کے ایک کونے سے دوسرے کونے تک ارزاں ترین ریٹ 30 روپے میں جاتا ہے، اس سے زیادہ سبسڈائزڈ ریٹس کی کوئی مثال نہیں ملتی۔
حافظ شکیل احمد نے کہا کہ عوام کی سہولت کیلئے ڈاک پر اٹھنے والے پورے اخراجات بھی پورے نہیں لیے جاتے، تاہم کوشش ہے کہ بہترین سروسز کی فراہمی کو یقینی بنائیں تاکہ عوام کا ادارے پر اعتماد برقرار رہے۔
دریں اثنا پاکستان پوسٹ نے ایکسپریس سروسز کے کارپوریٹ کسٹمرز کو ماہانہ ایک لاکھ روپے بکنگ کرانے پر 30 فیصد، 5 لاکھ روپے تک ماہانہ بکنگ پر 40 فیصد، 7 لاکھ روپے تک 50 فیصد اور ایک ملین تک بکنگ کرانے والے بڑے صارفین کو 75 فیصد ڈسکاؤنٹ دیا جائے گا۔
