اسلام آباد: (دنیا نیوز) سپیشل انویسٹمنٹ فیسلٹی کونسل کے تعاون سے پاکستان اور ترکیہ کے مابین تجارتی تعاون میں نئی پیشرفت ہوئی ہے۔
ایس آئی ایف سی کی بھرپور معاونت سے حکومت کے معاشی بحالی کے لیے اقدامات میں تیزی آ رہی ہے جس کے تحت ترکیہ کے ساتھ سالانہ 5 ارب ڈالر کے دو طرفہ تجارتی ہدف کے حصول کے لیے واضح اہداف مقرر کیے گئے ہیں۔
اسی تسلسل میں اسلام آباد استنبول ریل منصوبے کو تیزی سے مکمل کرنے کے لیے اقدامات جاری ہیں، 2023 سے ’’اشیا کی تجارت‘‘ کے معاہدے کے تحت پاکستان کو ترکیہ کی مارکیٹ میں ترجیحی رسائی حاصل ہے۔
اس معاہدے کی بدولت پاکستان کو 261 ٹیرف لائنز جبکہ ترکیہ کو 130 اشیا پر رعایت حاصل ہے، پاکستان کو ترکیہ کی منڈی میں ترجیحی رسائی حاصل ہونے سے برآمدات میں نمایاں اضافہ متوقع ہے۔
ترکیہ سے اقتصادی تعلقات مزید مضبوط بنانے کے لیے ہوائی اڈوں، صحت اور ڈیجیٹل نظام میں معاہدوں پر بھی غور کیا جا رہا ہے، اسی طرح شپ بریکنگ صنعت میں ترک کمپنیوں سے اشتراک بڑھانے اور سمندر و زمین میں وسائل کی تلاش کی ہدایات جاری کی گئی ہیں۔
حکومت اور ایس آئی ایف سی پاکستان اور ترکی کے درمیان اقتصادی تعلقات مزید مضبوط بنانے کے لیے پرعزم ہیں۔
