اسلام آباد:(دنیا نیوز) وزیر خزانہ سینیٹر محمد اورنگزیب پاک امریکہ تجارتی مذاکرات کی تکمیل کے لیے امریکہ روانہ ہو گئے،ان کے دورہ کے دوران پاک امریکہ ٹریڈ ڈایئلاگ پر حتمی بات چیت ہو گی۔
وزارت خزانہ کی جانب سے جاری اعلامیہ کے مطابق دونوں ملکوں کے مابین تجارتی معاہدہ کی تشکیل سے دونوں ممالک کی معیشتوں کو فائدہ ہو گا، مضبوط تجارتی اور معاشی تعلقات پاک امریکہ دوطرفہ تعلقات کا اہم ستون ہیں،امریکہ پاکستان کا سب سے بڑا تجارتی شراکت دار ہے۔
اعلامیہ میں یہ بھی بتایا گیا کہ پاکستان دو طرفہ تجارتی تعلقات کو روایتی اور غیر روایتی شعبوں تک وسعت دینے کا خواہش مند ہے،دونوں ممالک کے مابین انفارمیشن ٹیکنالوجی،آئی ٹی، معدنیات اور زراعت جیسے اہم شعبوں میں شراکت داری کے وسیع مواقع موجود ہیں۔
خیال رہے وزیر خزانہ کا دورہ امریکہ دونوں ملکوں کے مابین دوطرفہ تجارتی و معاشی تعلقات کو مضبوط بنانے کی کڑی ہے۔
