اسلام آباد: (دنیا نیوز) ملکی تجارت میں سمندری ٹریڈ کا حجم کم، حکومت بلیو ٹریڈ بڑھانے کے لیے سرگرم ہو گئی۔
نیشنل شپنگ، میری ٹائم اور ٹرانس شپمنٹ پالیسی تیاری کے آخری مراحل میں داخل ہو گئی، دنیا نیوز نے جہاز رانی صنعت کے عروج وزوال کی دستاویز حاصل کرلیں۔
دستاویز کے مطابق سمندری تجارت کے لیے سال 22-2021 بہترین رہا، اس سال سمندری تجارت 107 ملین ٹن کے لگ بھگ رہی۔
گزشتہ مالی سال پاکستان کی سمندری تجارت 96.37 ملین ٹن رہی، سال 23-2022 میں سمندری تجارت تقریبا 83 ملین ٹن تھی۔
دستاویز کے مطابق اس وقت بلیو ٹریڈ میں شپنگ کارپوریشن کا حصہ محض 10 فیصد ہے، سال 23-2022 میں یہ حصہ 13 اعشاریہ 05 فیصد تھا۔
شپنگ کارپوریشن نے سال 25-2024 میں کارپوریشن نے 90 ارب روپے منافع کمایا، اگلے سال کے لیے قبل از ٹیکس منافع کا ہدف 100 ارب روپے مقرر کیا گیا ہے۔
دستاویز کے مطابق کارگو ہینڈلنگ کا ہدف آئندہ برس کے لیے 104 ملین ٹن مقرر کیا گیا ہے، شپنگ کارپوریشن کے پاس اس وقت پانچ بڑے اور تین چھوٹے تیل بردار جہاز ہیں۔
شپنگ کارپوریشن کے پاس دو پٹرول ٹینکرموجود ہیں، مجموعی کارگو گنجائش 3 لاکھ 97 ہزار ملین ٹن ہے، کارگو، ایندھن، پانی، عملہ اور سامان کے ساتھ ان جہازوں کی صلاحیت 7 لاکھ 24 ہزار ملین ٹن ہے۔
