اسلام آباد: (ویب ڈیسک) وفاقی وزیر تجارت جام کمال خان نے کہا ہے کہ وسیع انشورنس کوریج اور جدید ریگولیٹری فریم ورک قومی ترقی کے لئے نہایت ضروری ہیں۔
وفاقی وزیر تجارت جام کمال نے وزارتِ تجارت کے انشورنس وِنگ اور سکیورٹیز اینڈ ایکسچینج کمیشن آف پاکستان (ایس ای سی پی) کے اشتراک سے منعقدہ بریفنگ سے خطاب کرتے ہوئے کہا کہ پاکستان میں انشورنس کوریج خطے کے دیگر ممالک کے مقابلے میں نہایت کم ہے۔
جام کمال نے کہا کہ اس کوریج کو بڑھانے کے لئے آگاہی، جدت اور ریگولیٹری نظام کی جدید کاری ضروری ہے، انشورنس صرف ایک مالیاتی آلہ نہیں بلکہ افراد اور کاروباروں کے لئے حفاظتی ڈھال ہے، پاکستان کو شمولیتی معاشی ترقی کے لئے انشورنس کوریج بڑھانا ہو گی۔
وفاقی وزیر کا مزید کہنا تھا کہ مجوزہ انشورنس آرڈیننس (ترمیمی) بل میں چار بڑے شعبوں میں اصلاحات شامل ہیں جن میں انشورنس مارکیٹ کو زیادہ مقابلے کے لئے کھولنا جس میں غیر ملکی انشورنس کمپنیوں اور ری انشوررز کا داخلہ، مائیکرو انشورز اور ڈیجیٹل انشورنس کمپنیوں کی الگ شناخت اور پبلک سیکٹر کے رسک میں نجی شعبے کی شمولیت شامل ہے۔
انہوں نے کہا کہ کاروباری آسانیوں، ٹیکنالوجی کے استعمال اور نئے انشورنس مصنوعات (جیسے انڈیکس بیسڈ انشورنس اور ڈیزاسٹر رسک کوریج) کو فروغ دینا، بنیادی قانون کو آسان بنانا اور آپریشنل تفصیلات کو ریگولیشنز میں منتقل کرنا تاکہ فریم ورک زیادہ لچکدار اور اصولی بنیادوں پر قائم ہو۔
