اسلام آباد:(دنیا نیوز) ٹریڈنگ کارپوریشن آف پاکستان کی جانب سے ایک لاکھ میٹرک ٹن چینی کی درآمد کے لئے ٹینڈر کھول دیے گئے۔
وزیراعظم شہباز شریف کی خصوصی ہدایت پر شفافیت کو یقینی بنانے کے لئے پوری کارروائی سرکاری ٹی وی پر براہ راست نشر کی گئی، ٹینڈر کھولنے کی تقریب میں پانچ کمپنیوں کے نمائندے موجود تھے۔
ٹرانسپرینسی انٹرنیشنل کے نمائندے بھی ٹینڈر کھولنے کی تقریب میں شرکت ہوئے، جنرل منیجر ٹی سی پی شیراز علی شہزاد نے تمام فریقین کے سامنے ٹینڈر کھولے۔
حکومت نے ٹی سی پی کے ذریعے سرکاری سطح پر چینی درآمد کرنے کا فیصلہ کیا ہے،اسی مقصد کے لئے 8 ستمبر کو ایک لاکھ ٹن چینی کی درآمد کے لئے بولیاں طلب کی گئیں۔
واضح رہے حکومت نے ملک میں چینی کی طلب پوری کرنے اور قیمتوں میں استحکام کے لئے ایک لاکھ ٹن چینی درآمد کرنے کا فیصلہ کیا تھا، اِس سے قبل بھی ٹی سی پی نے 21 اگست کو دو لاکھ میٹرک ٹن چینی کی درآمد کے لئے ٹینڈر کھولے تھے۔
