اسلام آباد: (دنیا نیوز) پاکستان نے بنگلہ دیش کو ایک لاکھ ٹن چاول برآمد کرنے کے لیے تیاریاں شروع کر دیں۔
ٹریڈنگ کارپوریشن آف پاکستان نے ایک لاکھ میٹرک ٹن چاول کی خریداری کے لیے باضابطہ طور پر ٹینڈر جاری کردیا ہے۔
ٹی سی پی کے مطابق چاول کراچی پورٹ کے ذریعے بنگلادیش برآمد کیا جائے گا، بولیاں جمع کرانے کی آخری تاریخ 28 نومبر مقرر کی گئی ہے جبکہ بولی کے لیے کم از کم 25 ہزار ٹن اور زیادہ سے زیادہ ایک لاکھ ٹن کی حد مقرر ہے۔
کنٹریکٹ ایوارڈ ہونے کے 45 روز کے اندر ترسیل کو لازمی قرار دیا گیا ہے، پاکستان نے حال ہی میں بنگلہ دیش کو خطے کے ممالک بشمول چین اور وسطی ایشیائی ریاستوں کے ساتھ تجارت کے لیے کراچی پورٹ بطور گیٹ وے استعمال کرنے کی پیشکش بھی کی ہے۔
رواں مالی سال کی پہلی سہ ماہی میں پاکستان کی چاول برآمدات میں 28 فیصد کمی ریکارڈ کی گئی۔
امریکا کی جانب سے بھارتی چاول سمیت مختلف مصنوعات پر 50 فیصد ٹیرف عائد کیے جانےکے بعد پاکستان کے لیے امریکی مارکیٹ میں نئی تجارتی گنجائش بھی پیدا ہوئی ہے۔
