اسلام آباد: (اے پی پی) پاکستان کے فاسٹ باؤلر محمد عرفان نے کہا ہے کہ انگلش کنڈیشنز میں پاکستانی نوجوان گیند باز لائن ولینتھ کے ساتھ مختلف ورائیٹیز کا استعمال کرکے حریف بیٹسمینوں کو پریشان کر سکتے ہیں۔
محمد عرفان کا کہنا تھا کہ مانچسٹر ٹیسٹ میں ہماری ٹیم نے زیادہ تر سیشنز میں بہتر کھیل پیش کیا تاہم آخر میں پارٹنرشپ کو نہیں توڑا جا سکا۔ سکواڈ کے ساتھ تجربہ کار کوچنگ سٹاف ہے، امید رکھنی چاہیے کہ دوسرے ٹیسٹ میں زیادہ اچھی پلاننگ کے ساتھ باؤلنگ ہوگی اور ٹیم سیریز میں کم بیک بھی کرے گی۔
ایک انٹرویو میں محمد عرفان نے کہا کہ قومی ٹیم سے ڈراپ ہونے پر مایوس نہیں، فٹنس مسائل کی وجہ سے کارکردگی میں فرق آیا، اب تمام مسائل پر قابو پال یا ہے،ون ڈے اور ٹی ٹوئنٹی ٹیموں میں واپسی کیلیے سخت محنت جاری ہے اور بس موقع ملنے کا منتظر ہوں۔
ایک سوال پر انہوں نے کہا کہ نسیم شاہ، شاہین آفریدی، محمد عباس اور دیگر نئے باؤلرز کے آنے سے مقابلے کا رجحان بڑھا ہے، اس کو بہت مثبت انداز میں لیتا ہوں، ایسے ماحول میں ہر باؤلر کی خواہش ہوتی ہے کہ وہ شاندار پرفارمنس سے ٹیم میں جگہ برقرار رکھے، اس رجحان سے ملک کو فائدہ ہی ہوتا ہے، میری توجہ بھی ٹیم میں واپسی پر مرکوز ہے۔
