راولپنڈی: (دنیا نیوز) راولپنڈی میں کھیلے گئے دوسرے ٹی ٹونٹی میچ میں زمبابوے کی ٹیم نے پاکستان کو جیت کیلئے 135 رنز کا ہدف دیا تھا، یہ ہدف پاکستان نے صرف دو وکٹوں کے نقصان پر حاصل کرکے تین میچوں کی سیریز دو صفر سے جیت لی۔
پاکستان کی جانب سے بابر اعظم نے صرف 28 گیندوں کا سامنا کرتے ہوئے 8 چوکوں اور ایک چھکے کی مدد سے 51 رنز کی کیپٹن اننگز کھیلی۔ حیدر علی نے ان کا خوب ساتھ دیا اور 43 گیندوں کا سامنا کرتے ہوئے چھ چوکوں اور 3 چھکوں کی مدد سے 66 رنز بنائے اور ناٹ آؤٹ رہے۔ پاکستان نے صرف پندرہ اعشاریہ ایک اوور میں صرف دو وکٹوں کے نقصان پر 137 رنز بنا کر 8 وکٹوں سے فتح اپنے نام کی۔
پاکستانی کپتان بابر اعظم نے ٹاس جیت کر زمبابوے کو پہلے بیٹنگ کی دعوت دی تھی۔ مہمان ٹیم کی جانب سے آر پی برل 32، مدھویری 24 چیگمبرا 18 جبکہ چیبابا 15 رنز بنا کر نمایاں بلے باز رہے۔ زمبابوے نے مقررہ 20 اوورز میں 7 وکٹوں کے نقصان پر 134 رنز بنائے تھے۔
پاکستان کی جانب سے حارث رؤف اور عثمان قادر نے تین تین وکٹیں حاصل کیں جبکہ فہیم اشرف ایک وکٹ حاصل کرنے میں کامیاب رہے۔
خیال رہے کہ پہلے ٹی ٹونٹی میچ میں قومی کرکٹ ٹیم کے کپتان بابر اعظم کی شاندار 82 رنز کی بدولت پاکستان نے زمبابوے کو 6 وکٹوں سے شکست سے کر تین ٹی ٹوئنٹی میچوں کی سیریز میں ایک صفر کی برتری حاصل کر لی تھی۔
پہلے ٹی ٹونٹی میچ میں زمبابوے نے ٹاس جیت کر پہلے بیٹنگ کا فیصلہ کیا اور 20 اوورز میں 6 وکٹوں کے نقصان پر 156 رنز بنائے۔ زمبابوے کی جانب سے نوجوان بیٹسمین مدھیویر نے شاندار بیٹنگ کا مظاہرہ کرتے ہوئے نصف سنچری سکور کی وہ 70 رنز پر ناقابل شکست رہے۔
مدھیویر نے 9 چوکے اور ایک چھکا لگایا۔ ایلٹن چگمبرا نے 21 اور شان ولیمز نے 25 رنز بنائے۔ پاکستان کی جانب سے حارث رؤف اور وہاب ریاض نے 2، 2 وکٹیں حاصل کیں۔ پاکستان نے مطلوبہ ہدف 18.5 اوورز میں 4 وکٹ کے نقصان پر پورا کر لیا۔
قومی ٹیم کی جانب سے بابر اعظم اور فخر زمان نے اننگز کا آغاز کیا۔ فخر 19 رنز بنانے کے بعد آئوٹ ہوئے اور نوجوان بلے باز حیدر علی صرف 7 رنز کے مہمان ثابت ہوئے۔
aa
کپتان بابر اعظم اور محمد حفیظ نے ذمہ داری کا مظاہرہ کرتے ہوئے شاندار بیٹنگ کی اور 36 گیندوں پر 53 رنز کی پارٹنر شپ قائم کی۔ اس دوران بابر اعظم نے اپنی نصف سنچری مکمل کی اور وہ 55 گیندوں پر 82 رنز کی شاندار اننگز کھیلنے کے بعد آئوٹ ہوئے جس میں ایک چھکا اور 9 چوکے شامل تھے جبکہ حفیظ 36 رنز بنا کر آئوٹ ہوئے۔ زمبابوے کی جانب سے مزاربانی نے 2 وکٹیں حاصل کیں۔
اس سے قبل زمبابوے نے ٹاس جیت کر بیٹنگ کا فیصلہ کیا تو برینڈن ٹیلر اور کپتان چمو چھبابا نے اننگز کا آغاز کیا تاہم محمد حسنین نے پہلے ہی اوور میں چھبابا کو کھاتہ کھولے بغیر پویلین واپس بھیج دیا۔
ٹیلر اور سین ولیمز نے جارحانہ انداز میں کھیل کو آگے بڑھایا تاہم 34 کے مجموعی اسکور پر حارث رئوف نے ٹیلر کو پویلین واپس بھیج دیا وہ 20 رنز بناکر آئوٹ ہوئے اور سین ولیمز کی اننگز عثمان قادر نے 25 رنز پر ختم کی جب کہ سکندر رضا صرف 7 رنز کے مہمان ثابت ہوئے۔
