لاہور: (ویب ڈیسک) پاکستان کرکٹ بورڈ نے پہلی ویمن سپر لیگ کے لیے اس سال ستمبر کی ونڈو مختص کر دی ہے، ویمن سپر لیگ کو پی ایس ایل سے علیحدہ ایونٹ کے طور پر منعقد کیا جائے گا۔
نجم سیٹھی کی سربراہی میں پاکستان کرکٹ بورڈ کی مینجمنٹ کمیٹی نے ویمن کرکٹ لیگ کو پی ایس ایل کا سائیڈ لائن ایونٹ بنانے کی بجائے باضابطہ الگ ایونٹ کرانے کا فیصلہ کیا ہے۔
ذرائع کے مطابق ویمن کرکٹ لیگ کا پہلا ایونٹ اس سال ستمبر میں ہو گا، ویمن لیگ میں 5 فرنچائز ٹیمیں ہوں گی اور فرنچائز حقوق کے لیے علیحدہ بڈنگ کی جائیں گی۔
ذرائع کا بتانا ہے کہ پی سی بی کو پہلے ہی دنیا بھر سے خواتین کرکٹرز سے شرکت کے لیے اظہار دلچسپی موصول ہو چکا ہے۔
واضح رہے کہ اس سے قبل رمیز راجا کی سربراہی میں پی سی بی کا ارادہ تھا کہ ویمن لیگ کو پی ایس ایل کے سائیڈ لائنز پر کرایا جائے۔
ذرائع کا مزید کہنا ہے کہ پاکستان کرکٹ بورڈ ویمن لیگ کے لیے ملالہ فاؤنڈیشن سمیت اقوان متحدہ سے وابستہ خواتین کی دیگر عالمی تنظیموں کو بھی آن بورڈ رکھنے کا ارادہ رکھتا ہے تاکہ ٹورنامنٹ کے ذریعے پاکستان کا مثبت امیج اجاگر کیا جاسکے۔
