میلبورن: (ویب ڈیسک) کرکٹ آسٹریلیا ویب سائٹ نے آئی سی سی ورلڈ ٹیسٹ چیمپئن شپ ٹیم آف دی ٹورنامنٹ کا اعلان کردیا۔
آئی سی سی ورلڈ ٹیسٹ چیمپئن شپ کے فائنل میں آسٹریلیا اور بھارت کی ٹیمیں مقابل ہوں گی جس کا فائنل 7 سے 11 جون تک انگلینڈ میں شیڈول ہے۔
پاکستان کے کپتان بابراعظم کو ورلڈ ٹیسٹ چیمپئن شپ ٹیم آف دی ٹورنامنٹ میں شامل کیا گیا ہے۔
بابر اعظم نے چیمپئن شپ کے دوران 14 ٹیسٹ میچ کھیلے، انہوں نے 1527 رنز 08. 61 کی اوسط سے بنائے جس میں چار سنچریاں اور 10 نصف سنچریاں بھی سکور کیں، بابر اعظم کا سب سے زیادہ سکور 196رنز تھا جو آسٹریلیا کے خلاف بنایا۔
اس کے علاوہ ٹیم میں آسٹریلیا کے عثمان خواجہ، ٹریوس ہیڈ اور پیٹ کمنز شامل ہیں، ٹیم کے کپتان پیٹ کمنز ہیں۔
آئی سی سی ورلڈ ٹیسٹ چیمپئن شپ کے دیگر کھلاڑیوں میں بھارت کے رویندرا جڈیجا، ریشبھ پنت، روی چندرن ایشون، انگلینڈ کے جوروٹ، جیمزاینڈرسن اورسری لنکا کے ڈیمتھ کرونارتنے اور جنوبی افریقا کے کگیسو ربادا بھی شامل ہیں۔
