لاہور: (ویب ڈیسک) رواں برس ہونے والے آئی سی سی ٹی 20 ورلڈ کپ کا ممکنہ شیڈول تیار کرلیا گیا۔
ٹی 20 ورلڈکپ 4 جون سے 20 جون تک امریکا اور ویسٹ انڈیز میں منعقد ہو گا جس میں 20 ٹیمیں شرکت کریں گی، پہلے راؤنڈ میں پانچ، پانچ ٹیمیں چار گروپس میں مدمقابل ہوں گی۔
ذرائع کے مطابق ہر آئی سی سی ایونٹ کی طرح اس بار بھی پاکستان اور بھارت کو ایک ہی گروپ میں رکھا گیا ہے، پاکستان اور بھارت کے ساتھ گروپ میں آئرلینڈ، کینیڈا اور میزبان امریکا بھی شامل ہے اس لیے پہلے راؤنڈ میں اس گروپ کے زیادہ تر میچز امریکا میں کھیلے جائیں گے۔
ذرائع نے بتایا ہے کہ پاکستان ٹیم ایونٹ کا پہلا میچ 6 جون کو ڈیلیس میں امریکا کے خلاف کھیلے گی جس کے بعد 9 جون کو نیویارک میں پاکستان اور بھارت کا میچ تجویز ہے جبکہ 11 جون کو پاکستان اور کینیڈا کا میچ نیویارک میں ہی پڑے گا، 16 جون کو پاکستان اور آئرلینڈ کے درمیان میچ فلوریڈا میں شیڈول ہے۔
پہلے راؤنڈ میں شریک چاروں گروپس میں سے دو ٹاپ ٹیمیں سپر ایٹ راؤنڈ میں کوالیفائی کریں گی جہاں انہیں 2 گروپس میں تقسیم کیا جائے گا۔
ذرائع کا کہنا ہے کہ آئی سی سی نے فیڈ بیک اور منظوری کے لیے یہ شیڈول بورڈز اور براڈ کاسٹرز کو بھیج دیا ہے جس کے بعد جلد ہی حتمی شیڈول جاری کردیا جائے گا۔
