کراچی: (ویب ڈیسک) قومی کرکٹ ٹیم کے فاسٹ باؤلر شاہین شاہ آفریدی نے کہا ہے کہ سہ قومی کرکٹ سیریز کا مقصد چیمپیئنز ٹرافی کے لئے تیاری کرنا ہے،جنوبی افریقہ کے خلاف کامیابی پر بہت خوشی ہے۔
قومی کرکٹ ٹیم کے فاسٹ باؤلر شاہین شاہ آفریدی نے کراچی کے نیشنل سٹیڈیم میں گفتگو کرتے ہوئے کہا کہ میری انگلی بالکل ٹھیک ہے، ایکسرے کرایا ہے، کچھ سوجن باقی ہے امید ہے بہتر ہو جائے گی، مجھے معلوم ہے کہ باؤلنگ کے دوران میرے آخری اوور اچھے نہیں ہورہے۔
شاہین شاہ آفریدی نے جنوبی افریقی بیٹر میتھیوز کے ساتھ بحث کے حوالے سے کہا کہ دوران میچ میتھیو سے میدان میں گرما گرمی ہو گئی تھی، اب ہم اچھے دوست ہیں، پہلی بار اس نے کچھ نہیں بولا تھا، میں نے اسے وکٹ لینے کے لئے تنگ کیا تھا، بعد میں اس نے سنگل لیا تو مجھے ہٹ کیا، جس کے بعد ہم دونوں کے درمیان بحث ہوئی اور سخت الفاظ کا تبادلہ بھی ہوا۔
ان کا مزید کہنا تھا کہ گراؤنڈ میں جو بھی تھا وہ وہیں کی حد تک تھا، کھیل میں اکثر ایسے حالات پیدا ہو جاتے ہیں تاہم میچ کے بعد میتھیو اور میری ملاقات ہوئی اور ہم نے ایک دوسرے سے ہاتھ ملایا اور اچھے دوست بن گئے، یہاں کوئی بابر یا شاہین نہیں صرف پاکستان ہے، منفی چیز جب تک ہوگی کہیں بھی ترقی نہیں ہوسکے گی۔
