کراچی: (دنیا نیوز) کراچی میں ایف آئی اے کمرشل بینکس سرکل نے کارروائی کرتے ہوئے84 لاکھ روپے سے زائد کی خورد برد میں ملوث نیشنل بینک کے 3 ملازمین اور ایک پرائیویٹ ملازم کو گرفتار کرلیا۔
ڈپٹی ڈائریکٹر فہد خواجہ ایف آئی اے کے مطابق گرفتار ملزمان میں اشہد صدیقی،جہانزیب بشیر، کریم بخش اورمحمد اوصاف شامل ہے،بینک ملازمین نے ملی بھگت سے جعل سازی اور فراڈ کی واردات نیشنل بینک کی این اوآر کمپلیکس میں کی۔
مرکزی ملزم اشہد صدیقی نامی آئی ٹی ماہر نے بینک ملازمین کی ملی بھگت سے نجی کمپنی کےہم نام اکاونٹ ہولڈر کی رقم اپنے اکاونٹ میں منتقل کی۔
ایف آئی اے حکام کا کہنا ہے جعلسازی میں ملوث مختلف برانچز کے بینکاروں میں اے وی پی،منیجر،آپریشن افسر،افسر گریڈ ون،منیجر،ہیڈ کیشئیر کو بھی شامل تفتیش کیا جائے گا جبکہ خالد رشید اور حسین میمن نامی دو بینک ملازم کو بھی گرفتار کیا جائے گا۔
