کراچی: (شہباز خان) سال بدلا لیکن حال نہ بدلا! کراچی میں سال کے پہلے مہینے میں بھی قتل کی وارداتیں نہ رک سکیں، رواں ماہ کے دوران فائرنگ سے 33 افراد قتل کر دیئے گئے۔
فائرنگ کے مختلف واقعات میں 120 سے زائد افراد زخمی بھی ہوئے ہیں، واقعات ڈکیتی مزاحمت، ذاتی دشمنی، ہوائی فائرنگ کے باعث پیش آئے، جنوری 2025 میں ڈاکوؤں نے فائرنگ کر کے 5 شہریوں سے جینے کا حق چھین لیا۔
ایف بی ایریا میں معیز، کورنگی میں مظفر، گھگھر پھاٹک پر عارف ڈاکوؤں کی گولیوں کا نشانہ بنا، کورنگی ضیاء کالونی میں عارف، کورنگی تین نمبر پر ساحل ڈاکوؤں کی فائرنگ سے قتل ہو گیا، مختلف علاقوں میں ڈکیتی مزاحمت پر فائرنگ سے 41 شہری زخمی ہوئے ہیں۔
شہر میں ہوائی فائرنگ کے واقعات میں دو بچوں سمیت 4 افراد جان سے گئے، لانڈھی میں حمید، سپر ہائی وے پر 13 سالہ بچی ہوائی فائرنگ کا نشانہ بنی، سرجانی تیسر ٹاؤن میں کم عمر گنجو ایلن ہوائی فائرنگ کی زد میں آ گئے۔
ہوائی فائرنگ کے دیگر واقعات میں 26 افراد زخمی ہوئے، مختلف علاقوں میں نامعلوم افراد کی فائرنگ سے 16 افراد جان کی بازی ہار گئے، 15 زخمی ہوئے جبکہ ذاتی جھگڑے اور دشمنی کی بنا پر فائرنگ سے 8 افراد جان گنوا بیٹھے جبکہ 37 زخمی ہوئے ہیں۔
