شکار پور: (دنیا نیوز) شکار پور میں پولیس آپریشن روکنے کیلئے ڈاکوؤں نے 7 افراد کو اغوا کر لیا۔
پولیس حکام کا کہنا ہے کہ شکارپور میں چک ٹاؤن کے علاقے سکھیو ملک سے ڈاکوؤں نے پولیس آپریشن روکنے کیلئے 7 افراد کو اغوا کیا ہے، پولیس ڈاکوؤں کے تعاقب میں روانہ ہوگئی ہے۔
حکام کے مطابق اغوا کئے گئے افراد میں 4 سالہ سلیمان، عزیز اللہ، نور محمد، فرحان، شفیع محمد شامل ہیں۔
اس سے قبل ایس ایس پی راجن پور عتیق طاہر کے مطابق راجن پور کے علاقے روجھان میں ڈاکوؤں نے پولیس چوکی پر حملہ کیا جس کے بعد حملہ آور 7 اہلکاروں کو اپنے ساتھ لے گئے تھے۔
ایس ایس پی راجن پور کے مطابق مغوی اہلکاروں میں لقمان، ذیشان، شاکر، صابر، جمشید، صفدر اور مزمل شامل تھے۔
عتیق طاہر نے کہا کہ پٹ گینگ کے سربراہ عطااللہ پٹ نے پولیس اہلکاروں کو اغوا کیا جبکہ مغوی اہلکاروں کی بازیابی کیلئے پولیس کی بھاری نفری کچے کے علاقے میں روانہ کر دی گئی ہے۔
