لاہور: (دنیا نیوز) لاہور کے علاقے گرین ٹاؤن میں موٹرسائیکل سوار نے مدرسے سے پڑھ کر آنے والی دو بچیوں کو ہراساں کیا اور اُن کے ساتھ نازیبا حرکتیں کیں۔
موٹرسائیکل سوار بچیوں کا تعاقب کرتا ہوا گلی میں آیا اور پھر ایک بچی کے ساتھ نازیبا حرکتیں کیں اور بچی کے شور مچانے پر پیچھے ہٹا تاہم گلی میں کسی کو آتا نہ دیکھ کر پھر سے گھناؤنی حرکت کی۔
پولیس سی سی ٹی وی فوٹیج سامنے آنے کے بعد ملزم کی شناخت اور گرفتاری کیلئے حرکت میں آگئی، دوسری جانب ڈی آئی جی آپریشن فیصل کامران نے واقعہ کا نوٹس لیتے ہوئے ملزم کی گرفتاری کیلئے ایس پی صدر کی سربراہی میں ٹیم تشکیل دی۔
پولیس نے جدید ٹیکنالوجی کی مدد سے اوباش کو گرفتار کرلیا جس کی شناخت حمزہ کے نام سے ہوئی ہے، واضح رہے کہ ویڈیو وائرل ہوتے ہی گرین ٹاؤن پولیس نے ایف ائی آر درج کرکے فوری کارروائی کا اغاز کیا تھا، سیف سٹی اور سی سی ٹی وی کی مدد سے ملزم کو 12 گھنٹے میں حراست میں لے لیا گیا۔
پولیس حکام نے بتایا کہ ملزم حمزہ کو بلاک تھری سیکٹر سی ون ٹاؤن شپ سے گرفتار کیا گیا، انہوں نے کہا کہ خواتین اور بچیوں کو ہراساں اور تنگ کرنے والے عناصر کے خلاف زیرو ٹالرنس پالیسی ہے۔
