کوئٹہ:(دنیا نیوز) بلوچستان کے دارالحکومت کوئٹہ میں سیاہ کاری کے الزام میں باپ نے فائرنگ کرکے بیٹی اور بھانجے کو قتل کردیا۔
پولیس کے مطابق بلوچستان میں سیاہ کاری پر قتل کا ایک اور واقعہ پیش آیا ہے، کوئٹہ کے علاقے قمبرانی روڈ پر باپ نے فائرنگ کرکے بیٹی اور بھانجے کو موت کے گھاٹ اتار دیا۔
پولیس نے بتایا فائرنگ کے نتیجے میں نازنین اور غلام قادر جاں بحق ہو گئے جبکہ ملزم عبد اللطیف واردات کے بعد فرار ہونے میں کامیاب ہو گیا،لاشوں کو قانونی کارروائی کے لیے ہسپتال منتقل کر دیا گیا، جہاں ضابطے کی کارروائی مکمل ہونے کے بعد میتیں ورثا کے حوالے کر دی گئیں۔
پولیس کا مزید کہنا ہے کہ کیچی بیگ تھانے کی ٹیم ملزم کی گرفتاری کے لیے چھاپے مار رہی ہے اور جلد اسے گرفتار کر لیا جائے گا جبکہ پولیس حکام کے مطابق واقعے کی مزید تفتیش جاری ہے۔
