لاہور: (دنیا نیوز) لاہور کی مقامی عدالت نے 14 سالہ گھریلو ملازمہ پر تشدد و جنسی زیادتی کے کیس میں گرفتار اسٹیج اداکارہ و ڈانسر ثمر رانا کو مقدمے سے ڈسچارج کر دیا۔
سٹیج اداکارہ ثمر رانا کو انویسٹی گیشن پولیس نواب ٹاؤن نے عدالت میں پیش کیا، جوڈیشل مجسٹریٹ زیب شہزاد چیمہ نے کیس کی سماعت کی اور ثمر رانا کو فوری رہا کرنے کا حکم دے دیا۔
عدالت نے حکم دیا کہ گرفتاری کے بعد 24 گھنٹے میں ملزمہ کو عدالت پیش نہ کرنے پر تفتشی افسر کے خلاف کارروائی کی جائے، پولیس کی جانب سے ملزمہ کے جسمانی ریمانڈ کی استدعا کی گئی، عدالت نے ریمارکس دیے کہ غیر ضروری طور پر مکینیکلی کسی بھی ملزم کا ریمانڈ نہیں دیا جا سکتا۔
عدالت نے کہا کہ ریکارڈ کا جائزہ لیا گیا ملزمہ ثمر رانا کے خلاف کوئی مواد موجود نہیں ہے، عدم ثبوت کی بنیاد پر ملزمہ ثمر رانا کو مقدمے سے ڈسچارج کیا جاتا ہے۔
واضح رہے کہ 25 اگست کو سٹیج اداکارہ و ڈانسر ثمر رانا کو 14 سالہ ملازمہ پر تشدد، استحصال اور ملازمہ کے گینگ ریپ کی سہولت کاری کے الزام میں گرفتار کرلیا گیا تھا۔
پولیس نے بتایا تھا کہ متاثرہ لڑکی نے الزام عائد کیا تھا کہ اداکارہ کے گھر پر پانچ نامعلوم افراد نے ان کا ریپ کیا تھا جبکہ ثمر رانا نے انہیں جسمانی تشدد کا نشانہ بنایا تھا، نواب ٹاؤن پولیس نے مقدمہ درج کر کے اداکارہ کو حراست میں لے لیا تھا۔
