لاہور: (دنیا نیوز) ہیئر کےعلاقہ میں دو خواتین اور ایک بچے سمیت چار افراد کو قتل کر دیا گیا۔
ملزم عمران نے گھریلو ناچاقی پر بیوی فوزیہ، 14 سالہ بیٹی زینب، 15 سالہ بھتیجے رضا، 55 سالہ سسر مرزا کو چھریوں کے وار کرکے قتل کیا اور موقع سے فرار ہوگیا۔
واقعہ کی اطلاع پر پولیس کی بھاری نفری اور امدادی ٹیمیں بھی موقع پر پہنچ گئیں، جاں بحق ہونے والے چاروں افراد کی لاشوں کو ضروری کارروائی کے لئے ہسپتال منتقل کر دیا گیا۔
ایس پی کینٹ قاضی علی رضا نے بتایا کہ پولیس اور فرانزک ٹیم نے موقع سے شواہد اکٹھے کر لئے، مقتولہ کے بھائی ندیم کی مدعیت میں نامزد ملزم عمران کے خلاف مقدمہ درج کر لیا گیا، ملزم کی گرفتاری کے لیے ٹیم تشکیل دے کر چھاپے مارے جا رہے ہیں۔
ایس پی کینٹ کا مزید کہنا تھا کہ قانون ہاتھ میں لینے والوں سے آہنی ہاتھوں نمٹا جائیگا، ملزم کو جلد گرفتار کر کے قانون کے کٹہرے میں لایا جائیگا اور قرار واقعی سزا دلوائی جائے گی۔
