لاہور: (دنیا نیوز) قتل کے مقدمہ میں ملوث اشتہاری مجرم کو سی سی ڈی نے آذربائیجان سے گرفتار کر لیا۔
سی سی ڈی پنجاب کے سپیشل آپریشنز سیل نے آذربائیجان میں کامیاب کارروائی کی، اشتہاری غلام عباس سال 2015 میں سیالکوٹ کے شہری کو قتل کرکے آذر بائیجان فرار ہو گیا تھا۔
سی سی ڈی پنجاب کے سپیشل آپریشنز سیل نے مجرم اشتہاری کا انٹرپول سے ریڈ نوٹس جاری کروایا، سی سی ڈی ٹیم مجرم اشتہاری غلام عباس کو لے کر آذربائیجان سے پاکستان کے لئے روانہ ہوگئی ہے۔
ایڈیشنل آئی جی سی سی ڈی سہیل ظفر چٹھہ کی طرف سے ڈی آئی جی عمرسلامت، آر او گوجرانوالہ اور سپیشل آپریشنز سیل کی ٹیم کو شاباش دی۔
ترجمان سی سی ڈی کا کہنا ہے کہ ایف آئی اے اورانٹرپول کی مدد سے بیرون ممالک مفرور اشتہاری مجرمان کو گرفتار کر کے قانون کے کٹہرے میں لایا جارہا ہے۔
