کراچی:(دنیا نیوز) شہر قائد میں ہاؤسنگ سوسائٹی کی کیش وین سے ڈاکوؤں نے کروڑوں روپے لوٹ لیے۔
پولیس کے مطابق گزشتہ روز 5 مسلح افراد نے کیش وین سے 2 کروڑ 32 لاکھ روپے لوٹے اور واقعہ منگھوپیر تھانے سے 2کلومیٹر کے فاصلے پر پیش آیا۔
دوسری جانب پولیس نے بتایاکہ مقدمہ سوسائٹی کے سکیورٹی سپروائزر کی مدعیت میں منگھوپیرتھانے میں درج کرلیا گیا جس میں کہا گیا ہے کہ ہماری سوسائٹی کی کیش وین نجی بینک کے سامنے آکر رکی، ہمارا رائیڈر 22لاکھ سے زائدرقم کا تھیلا کیش وین سے لےکربینک چلاگیا۔
مقدمے کے متن میں کہا گیا کہ کیش وین واپس جانے لگی تو پانچ مسلح ڈاکوؤں نےگھیرلیا اور ملزمان کیش وین سے پیسوں سے بھرا تھیلا چھین کر 2موٹرسائیکلوں پر فرارہوگئے۔
ایف آئی آر میں یہ بھی لکھا گیا کہ چھینے گئے تھیلے میں 2کروڑ 32لاکھ روپے سے زیادہ کی رقم تھی، ڈاکو سکیورٹی گارڈ سے اسلحہ اور گولیاں بھی چھین کر لے گئے۔
